Душанбе, 28-уми январи соли 2019

Аз 24-ум то 26-уми январи соли 2019 бо фармоиши вазири маориф ва илми Ҷумҳурии Тоҷикистон барои омӯзгорон курси шиносоӣ бо низоми имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбӣ дар сатҳи шаҳру ноҳияҳо гузаронида шуд. Инчунин, тибқи нақшаи фаъолияти Маркази миллии тестии назди Президенти Ҷумҳурии Тоҷикистон (Марказ) аз 28-уми январи соли 2019 то 6-уми марти соли 2019 дар муассисаҳои таълимии таҳсилоти умумии асосӣ, миёнаи умумӣ, ибтидоӣ ва миёнаи касбии шаҳру ноҳияҳои ҷумҳурӣ вохӯриҳои кормандони Марказ (бо фарогирии кормандони муваққатӣ) бо хатмкунандагони муассисаҳои мазкур, падару модарон, омӯзгорон ва алоқамандони дигари низоми имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбӣ доир хоҳад гашт.

Аз 28-уми январ то 2-юми феврали соли ҷорӣ бо фармоиши директори Марказ 32 нафар корманди ин муассиса барои ташкилу баргузории вохӯриҳо ба 60 шаҳру ноҳияи ҷумҳурӣ сафарбар карда мешаванд. Тибқи нақша, дар давоми 6 рӯз вохӯриҳои кормандони Марказ бо алоқамандони низоми ИМД дар 220 муассисаи таълимӣ баргузор мегардад.

Дар баробари ин, кормандони Марказ ҳангоми сафари хизматӣ ба шаҳру ноҳияҳои ҷумҳурӣ бо мақсади воқиф кардани кормандони мақомоти иҷроияи ҳокимияти давлатӣ ва раёсату шуъбаҳои маорифи шаҳру ноҳияҳои ҷумҳурӣ аз муҳимтарин хусусиятҳои низоми имтиҳонҳои номбурда бо онҳо суҳбат карда, маводди иттилоотию методии зарурӣ, аз ҷумла дастури иттилоотию методии “Роҳнамои довталаб” ва маҷмӯаи саволу масъалаҳои тестро дастрасашон мегардонанд. Ин мавод, инчунин, барои баҳраманд шудани хоҳишмандон аз иттилооти зарурии вобаста ба ИМД ба китобхонаҳо тақдим карда мешавад.

Бояд қайд намуд, ки дар давоми моҳҳои январ – марти соли ҷорӣ дар 3560 муассисаи таълимии шаҳру ноҳияҳои ҷумҳурӣ аз тарафи таблиғгарони низоми ИМД дар сатҳи ҷумҳурӣ вохӯриҳо баргузор мешаванд. Пешбинӣ карда мешавад, ки дар чунин вохӯриҳо бештар аз 150000 нафар хатмкунанда иштирок мекунанд.