Чуноне ки ҳама иттилоъ доранд, шурӯъ аз соли 2014 дар Ҷумҳурии Тоҷикистон низоми нави қабули донишҷӯён ба муассисаҳои таҳсилоти олии касбии Ҷумҳурии Тоҷикистон тавассути интиҳонҳои марказонидашудаи дохилшавӣ ҷорӣ карда мешавад.

Бо мақсади ҷалби бештари ҷомеа ва дар сатҳи баланд ташкилу гузаронидани корҳои фаҳмондадиҳӣ ва таблиғотию ташвиқотӣ Маркази миллии тестӣ дар чор минтақаи ҷумҳурӣ (шаҳрҳои Душанбе, Қӯрғонтеппа, Хуҷанд ва Хоруғ) семинари омӯзишӣ бо иштироки мудирони кабинетҳои методии шуъбаҳои маорифи шаҳру ноҳияҳои ҷумҳурӣ доир менамояд.

Бо ин мақсад 29 ноябр дар бинои асосии Маркази миллии тестӣ семинари омӯзишӣ баргузор гардид. Дар семинар кормандони Раёсати маорифи шаҳри Душанбе, мудирони кабинетҳои методӣ ва нозирони шуъбаҳои маорифи шаҳру ноҳияҳои тобеи ҷумҳурӣ иштирок намуданд.

Ба иштирокчиёни семинар тибқи барнома сардорони шуъбаҳои Маркази миллии тестӣ Саидов П., Раҳмонов М., Азимов Ҷ., Шодиев М. ва Табарова Р. оид ба низоми нави имтиҳонҳои марказонидашудаи дохилшавӣ ба муассисаҳои таҳсилоти олии касбии Ҷумҳурии Тоҷикистон маълумоти пурра тариқи муаррифӣ (презентатсия) пешниҳод намуданд. Инчунин, ба иштирокчиён маводи иттилоотӣ барои истифодабарӣ ва дастрасии хонандагон тақсим карда шуд.

Чунин семинарҳо 4 декабр дар шаҳри Хуҷанд, 6 декабр дар шаҳри Қӯрғонтеппа ва 10 декабр дар шаҳри Хоруғ низ доир гардид.

Дар онҳо зиёда аз 63 нафар аз ҳисоби мудирони кабинетҳои методӣ ва нозирони шуъбаҳои маорифи шаҳру ноҳияҳои ҷумҳурӣ ҷиҳати ташкил ва гузаронидани вохӯриҳо дар байни омӯзгорон, падару модарон ва хатмкунандагони муассисаҳои таълимии таҳсилоти миёнаи умумӣ омӯзонида шуда, ба мактабҳои ҷумҳурӣ сафарбар карда шуданд.