КОНСТИТУТСИЯ ВА НАҚШИ ОН ДАР ТАҲКИМИ ДАВЛАТДОРИИ МИЛЛӢ
Зери ин унвон имрӯз дар Маркази миллии тестии назди Президенти Ҷумҳурии Тоҷикистон ҷаласаи идона баргузор шуд.
Сараввал муовини якуми директори Маркази миллии тестӣ Ҷаъфарзода Сабзалӣ ҷаласаро оғоз бахшида, кормандони Марказро бо Рӯзи Коститутсияи Ҷумҳурии Тоҷикистон табрик кард ва аз ҷумла иброз дошт, ки 6-ноябри соли 2021 аз қабули волотарин ва муҳимтарин санади ҳуқуқии мамлакатамон-Конститутсияи Ҷумҳурии Тоҷикистон 27 сол пур шуд. Истиқлолияти давлатии Тоҷикистон тавассути ҳамин Конститутсия аз нигоҳи ҳуқуқӣ ба расмият дароварда шуд. Қабули Конститутсия Тоҷикистонро дар арсаи байналмилалӣ ҳамчун давлати соҳибихтиёр, демократӣ, ҳуқуқбунёд, дунявӣ ва ягона муаррифӣ кард. Эҳтиром ва риояи меъёрҳои ин санади тақдирсози миллат вазифаи ҳар як фарди ватани азизамон мебошад.
Сипас чанде аз кормандон суханронӣ намуда, ҳар яке доир ба дастовардҳои муҳими даврони соҳибистиқлол ва нақши Конститутсия дар ин давра ибрози андеша карданд.
Дар охири ҷаласа чанде аз кормандони Марказ бо мукофотҳои соҳавӣ – бо нишони “Аълочии маориф ва илми Ҷумҳурии Тоҷикистон” ва “Ифтихорнома”-и Вазорати маориф ва илми Ҷумҳурии Тоҷикистон қадрдонӣ гардиданд.
