Душанбе, 6-уми ноябри соли 2024
Дар таърихи давлату миллатҳои ҷаҳон рӯйдодҳое ба вуқуъ мепайванданд, ки сарнавишт ва роҳи минбаъдаи онҳоро муайян мекунанд. Чунин рӯйдоди муҳим дар таърихи давлатдории навини тоҷикон қабули нахустин Конститутсияи Тоҷикистони соҳибистиқлол мебошад, ки мо имрӯз 30-юмин солгарди онро таҷлил менамоем.
Эмомалӣ Раҳмон
Сӣ сол муқаддам дар кишвари мо тавассути раъйпурсии умумихалқӣ нахустин Конститутсияи Тоҷикистони соҳибистиқлол, бахтномаи миллати тоҷик қабул гардид. Ин санаи таърихӣ ҳар сол бошукӯҳ таҷлил карда мешавад.
Қабули Конститутсия дастоварди арзишманди мардум ва давлати тоҷикон дар охири асри гузашта ба шумор рафта, натиҷаи талошҳои Президенти Ҷумхурии Тоҷикистон муҳтарам Эмомалӣ Раҳмон ва халқи шарафманди тоҷик дар роҳи расидан ба марҳилаи рушд ва муаррифии кишвари мо ба оламиён мебошад.
Аз ин хотир, қабули Конститутсияи давлати соҳибистиқлоли мо дорои аҳаммияти бузурги таърихиву сиёсӣ ба ҳисоб меравад.
Ин санади таърихӣ, инчунин, асосҳои сиёсиву ҳуқуқӣ ва иқтисодиву фарҳангии ҷомеа ва давлати Тоҷикистонро муайян намуда, низоми мукаммали ҳуқуқу озодиҳои инсонро муқаррар кард ва механизми амалигардонии онҳоро кафолат дод.
Дар асоси меъёрҳои конститутсионӣ кафолати таъмини амалишавии ҳуқуқу озодиҳои инсон ва ҳифзи онҳо асоси сиёсати давлат эътироф гардидааст ва Тоҷикистон дар муносибатҳои хориҷии худ сиёсати дарҳои кушода ва омодагии худро дар самти ба роҳ мондани ҳамкориҳои судманд бо давлатҳо ва созмонҳои байналхалқӣ дар асоси принсипи баробарӣ ва эҳтироми соҳибихтиёрӣ эълон кард.
Дар умум, метавон гуфт, ки дастовардҳои бузургтарини кишвари азизамон пас аз қабули Конститутсияи Ҷумҳурии Тоҷикистон, пеш аз ҳама, барқарор намудани сулҳу суботи комил ва ваҳдату пойдори миллӣ, таъмину таҳкими бехатарӣ ва баланд бардоштани ҳисси ватандӯстиву ватандорӣ дар миёни тамоми табақаҳои ҷомеа аст.
