Душанбе, 15-уми сентябри соли 2026
Имрӯз дар меҳмонхонаи «Hilton» бо ташаббуси Маркази миллии тестии назди Президенти Ҷумҳурии Тоҷикистон дар ҳамкорӣ бо Вазорати маориф ва илми Ҷумҳурии Тоҷикистон конфронси миллӣ баргузор шуд, ки мавзуаш натиҷаҳои Таҳқиқоти асосии Барномаи байналмилалии арзёбии хонандагон – PISA 2025 (Programme for International Student Assessment) дар муассисаҳои таълимии шаҳри Душанбе буд.
Дар конфронс директори Маркази миллии тестии назди Президенти Ҷумҳурии Тоҷикистон Ҷаъфарзода Сабзалӣ Файзалӣ, мудири бахши маориф ва иттилооти раёсати маориф, фарҳанг ва иттилооти Дастгоҳи иҷроияи Президенти Ҷумҳурии Тоҷикистон Қувватзода Сайдулло Зувайд, муовини вазири маориф ва илми Ҷумҳурии Тоҷикистон Каримзода Равшан, сафири Иттиҳоди Аврупо дар Тоҷикистон Дарски Радослав, намояндаи PISA-и Созмони ҳамкории иқтисодӣ ва рушд (СҲИР) Вилтард Натан ва дигар намояндагону масъулони соҳа иштирок доштанд.
Дар оғоз директори Марказ Ҷаъфарзода Сабзалӣ дар робита ба аҳаммияти ин конфоронс суханронӣ карда, таъкид намуд, муҳиммияти ин чорабинӣ дар он аст, ки шаҳри Душанбе бо намояндагӣ аз Тоҷикистон бори аввал дар ин таҳқиқоти бонуфузи ҷаҳонӣ иштирок кард. Ин қадам барои мо имкон дод, ки сатҳи саводи хонандагони 15-солаи худро дар заминаи стандартҳои ҷаҳонӣ муайян намоем. Маълумоти бадастомада барои мо на танҳо як нишондиҳанда, инчунин нақша ва роҳнамо барои ислоҳоти ояндаи соҳаи маориф мебошад.
Сиёсати маорифпарваронаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон ҳамеша ба рушди сармояи инсонӣ ва ворид шудани маорифи миллии мо ба фазои ҷаҳонии таҳсилот нигаронида шудааст. Иштироки Тоҷикистон дар арзёбии байналмилалии PISA маҳз бо дастгирии бевосита ва таваҷҷуҳи хоссаи Роҳбари давлат амалӣ гардид.
Ташкили ин таҳқиқот аз мо омодагии ҷиддии техникӣ ва логистикиро талаб мекард. Санҷиши асосӣ дар муассисаҳои таълимии шаҳри Душанбе аз 2-юм то 25-уми апрели соли 2025 гузашт, ки дар он 5771 нафар хонандаи 160 муассисаи таълимӣ, аз ҷумла мактабҳои миёна, литсейҳо, гимназияҳо ва муассисаҳои таълимии касбии ибтидоӣ ва миёна иштирок карданд. Ин интихоб аз ҷониби худи Созмони ҳамкории иқтисодӣ ва рушд ба таври тасодуфӣ ва шаффоф сурат гирифт, ки 92%-и тамоми наврасони 15-солаи пойтахтро фаро мегирад.
PISA таҳқиқоти байналмилалии сифати таҳсилот аст, ки дараҷаи қобилияти хонандагони 15-соларо дар истифодаи дониш ва малакаҳои ҳосилкардаашон барои ҳалли вазифаҳое, ки дар вазъиятҳои таълимӣ ва воқеии ҳаёт ба миён меоянд, арзёбӣ мекунад. Самтҳои асосии арзёбӣ саводи фанҳои табиатшиносӣ, саводи математикӣ ва саводи хондан аст. Таҳқиқот аз соли 2025 дар чор сол як маротиба гузаронида мешавад, – гуфт Ҷаъфарзода С.Ф.
Сипас мудири бахши маориф ва иттилооти раёсати маориф, фарҳанг ва иттилооти Дастгоҳи иҷроияи Президенти Ҷумҳурии Тоҷикистон Қувватзода Сайдулло Зувайд ва дигар намояндагону масъулон вобаста ба масъалаҳои баланд бурдани сифати таҳсилот ва масъалаи иштироки Тоҷикистон дар арзёбии байналмилалии PISA, ки маҳз бо дастгирии бевоситаи Президенти Ҷумҳурии Тоҷикистон, муҳтарам Эмомалӣ Раҳмон амалӣ гардид, суханронӣ намуданд.
Бояд гуфт, ки дар конфронс масъалаи дар даври навбатӣ – PISA 2029 ба шакли компютерӣ баргузор шудани ин арзёбӣ дар Тоҷикистон баррасӣ карда шуд.
