Душанбе, 13-уми апрели соли 2023
Дастгирии ятиму бепарасторон, маъюбону фақирон дар сиёсати Ҳукумати Ҷумҳурии Тоҷикистон мавқеи меҳварӣ дорад, ки инро Раиси Ҳукумат, Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар вохӯрию суханрониҳояшон бо аҳли ҷомеа қайд карда, дигаронро низ пайваста барои дастгирии ин қишри ҷомеа ва ёрӣ ба онҳо таъкид мекунанд.
Дар пайравӣ аз ташаббусу иқдомҳои инсондӯстонаю хайрхоҳонаи Пешвои миллат муҳтарам Эмомалӣ Раҳмон ва дар асоси супориши Роҳбари Дастгоҳи иҷроияи Президенти Ҷумҳурии Тоҷикистон аз 06.03.2023, № 26/10-111 дар бобати аёдат ва ёрӣ ба ятимону бепарасторон, маъюбону барҷомондагон ва аскарону сарбозон дар моҳи рамазон намояндагони Маркази миллии тестии назди Президенти Ҷумҳурии Тоҷикистон таҳти роҳбарии муовини якуми директори Марказ Шодиниё А. Ш. бо кормандони муассисаи таълимӣ-истеҳсолии нобиноёни шаҳри Душанбе вохӯрда, ба онҳо ёрии моддӣ расониданд. Кормандони муассисаи мазкур, тавре ки аз номаш бармеояд, нобиноёнанд ва ба гурӯҳи маъюбони гурӯҳҳои якуму дуюм мансубанд.
Шодиниё А. Ш. зимни вохӯрӣ ва суҳбат бо аҳли ин корхона аз сиёсати башардӯстонаи роҳбарияти давлату ҳукумати кишвар нисбат ба табақаҳои ниёзманд, ятимон ва маъюбон ёдовар шуда, таъкид кард, ки ин қишри ҷомеа таҳти ғамхории ҳамаҷонибаи Ҳукумати Ҷумҳурӣ ва Пешвои миллат қарор гирифта, аз ҳар ҷиҳат дастгирӣ меёбанд. Дастгирию ёрии ниёзмандон як нишони одамият, бахусус як хислати шоистаи халқи тоҷик аст, тавре ки Сарвари кишвар муҳтарам Эмомалӣ Раҳмон гуфтаанд: “Раҳму шафқат ба ниёзмандон, сила кардани сари ятимону шод кардани дили ранҷурон ва дастгириву нигоҳубини маъюбону камбизоатҳо яке аз хислатҳои азалии мардуми тоҷик маҳсуб шуда, аз фарҳангу тамаддуни пурғановати миллати мо сарчашма мегирад”.
Кормандони муассисаи таълимӣ-истеҳсолии нобиноёни шаҳри Душанбе бо миннатдорӣ аз ғамхориҳои Пешвои миллат муҳтарам Эмомалӣ Раҳмон ба кормандони Маркази миллии тестии назди Президенти Ҷумҳурии Тоҷикистон барои сахову дастгириҳояшон изҳори сипос карданд.
