Душанбе, 28‑уми июни соли 2022
Ба таваҷҷуҳи довталабоне, ки худро барои иштирок дар имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбии Ҷумҳурии Тоҷикистон дар марҳалаи иловагии бақайдгирӣ (аз 10-ум то 30-юми июни соли 2022) номнавис кардаанд, расонида мешавад, ки кабинети инфиродиашон баъд аз 5-уми июли соли 2022 фаъол карда мешавад. Бинобар ин, то он замон зарурати кӯшиши воридшавӣ ба кабинети инфиродие, ки ҳанӯз фаъол нест (ба кор надаромадааст) ва дар пайи он муроҷиат ба Марказ, ки мо наметавонем ба кабинет дароем, нест.
Ҳамчунин, ба диққати довталабоне, ки дар марҳалаи асосии бақайдгирии довталабон (аз 1-уми март то 30-юми апрел) худро номнавис карда, дар марҳалаи иловагии азнавбақайдгирии довталабон (аз 10-ум то 30-юми июн) интихобҳои аввалаи худро тағйир додаанд, мерасонем, ки барои онҳо низ кабинети инфиродиашон баъд аз 5-уми июли соли 2022 фаъол мегардад. Даъватномаҳои ҳамаи онҳое, ки дар марҳалаи иловагии бақайдгирӣ ё азнавбақайдгирии довталабон (аз 10-ум то 30-юми июн) иштирок кардаанд, баъд аз 5-уми июл омода карда мешавад. Онҳоро довталабон метавонанд фақат аз кабинети инфиродии худ ё аз Маркази миллии тестии назди Президенти Ҷумҳурии Тоҷикистон дастрас намоянд. Даъватномаҳои пешинаи довталабони дар марҳалаи асосии бақайдгирӣ (аз 1-уми март то 30-юми апрел) номнависшуда беэътибор мегардад, аз ин рӯ, онро партофта, фақат даъватномаи навро бояд ба эътибор гирифт.
