шаҳри Душанбе, 26‑уми июни соли 2019

25‑уми июни соли 2019 дар толори муассисаи таълимии таҳсилоти таълимии миёнаи умумии № 100-и ноҳияи Шоҳмансури шаҳри Душанбе ҷаласаи кории муштараки Маркази миллии тестии назди Президенти Ҷумҳурии Тоҷикистон ва Ҷамъияти дорои масъулияти маҳдуди “Сипари таълимгоҳ” баргузор гардид.

Мувофиқи тартиби муқарраркардаи Ҳукумати Ҷумҳурии Тоҷикистон барои таъмини бехатарӣ ва реҷаи воридшавӣ дар марказҳои имтиҳонӣ муассисаи муҳофизатӣ ҷалб ва кори кормандони он тибқи тартиби муқаррарнамудаи Марказ ба роҳ монда мешавад. Муассисаи муҳофизатӣ ва кормандони он барои риояи талаботи тартиби муқаррарнамудаи Марказ ва таъмини бехатарию реҷаи воридшавӣ дар марказҳои имтиҳонӣ масъуланд. Вобаста ба ин, соли ҷорӣ Марказ бо Ҷамъияти дорои масъулияти маҳдуди “Сипари таълимгоҳ” барои иҷрои вазифаҳои зикршуда тибқи тартиби муқарраркардаи Ҳукумати Ҷумҳурии Тоҷикистон шартнома ба имзо расонид.

Дар ҷаласа масъалаҳои марбут ба ташкил ва таъмини бехатарӣ дар марказҳои имтиҳонӣ ва амалисозии низоми назоратию иҷозати воридшавӣ ба биноҳои марказҳои имтиҳонӣ  баррасӣ гардид.

Дар ҷаласа директори Марказ Икромӣ Хуршед баромад карда, оид ба масъалаҳои таъмини муҳофизат ва назорати дохилу беруни марказҳои имтиҳонии воқеъ дар шаҳру ноҳияҳои ҷумҳурӣ, инчунин амалисозии низоми назоратию иҷозат барои воридшавии кормандони маркази имтиҳонӣ, довталабон, намояндагон ва кормандони ваколатдори Марказ, аъзои комиссияи ҷамъиятӣ, кормандони ҷалбшудаи тиб таъкид кард. Номбурда қайд кард, ки назорати риояи тартиботи муқаррарнамудаи Марказ, қоидаҳои бехатарӣ ва пешгирӣ аз сӯхтор бояд таҳти ҳамоҳангсозӣ ва назари бахши бехатарии Марказ ва дар ҳамкорӣ бо намояндагони сохторҳои дигари давлатӣ  амалӣ карда шавад.