Маркази миллии тестии назди Президенти Ҷумҳурии Тоҷикистон ба диққати довталабон мерасонад, ки то 31-уми майи соли ҷорӣ ирсоли даъватномаҳо барои иштирок дар имтиҳонҳои марказонидаи дохилшавӣ ва имтиҳонҳои эҷодӣ ва маҳорат дар шакли чопӣ ба таври зайл сурат мегирад:

1. Тавассути шуъбаҳои маорифи шаҳру ноҳияҳо.

2. Шуъбаҳои минтақавии Маркази миллии тестӣ.

3. Муассисаҳои таълимии таҳсилоти миёнаи умумӣ.

4. Ва нуқтаҳои бақайдгирӣ

Инчунин, шакли электронии даъватнома тариқи кабинети инфиродии довталаб дастрас карда мешавад.

Барои воридшавӣ ба кабинети инфиродӣ довталаб бояд аз сомонаи расмии Марказ (www.ntc.tj) истифода барад.

Дар саҳифаи асосии сомона пайванди “Кабинети инфиродӣ”-ро пахш намояд.

Дар равзанаи пайдошуда дар майдони “Номи корбар” довталаб рақами назоратии худро ворид созад.

Дар майдони “Рамз” рамзи муваққатии худро барои бори аввал ворид шудан ба кабинети инфиродии худ дохил кунад.

Дар вақти ворид кардани рамз довталаб бояд ба ҳарфҳои калон ва хурди лотиниасос диққат диҳад!

Пас аз пахши тугмаи “Воридшавӣ” система аз довталаб иваз кардани рамзи муваққатиро талаб мекунад.

Баъд аз бомуваффақият иваз кардани рамзи муваққатӣ кабинети инфиродии довталаб кушода мешавад, ки дар он маълумоти инфиродии довталаб ҷой дода шудааст.

Пас аз анҷоми раванди бақайдгирӣ барои ҳар як довталаб даъватнома ба имтиҳонҳои марказонидаи дохилшавӣ таҳия карда мешавад. Нусхаи электронии даъватномаи довталаб дар бахши “Маълумотномаи инфиродӣ” ҷой дода мешавад, ки онро метавон сабт ва чоп кунад.

Дар бахши ихтисосҳо маълумот дар бораи гурӯҳи ихтисосҳо (кластер) ва ихтисосҳои интихобкардаи довталаб вобаста ба муассисаҳои таълимии таҳсилоти олии касбӣ, шакл, намуд ва забони таҳсил ҷой дода шудааст, ки ихтисосҳо аз рӯи авлавияти интихоби онҳо ба тартиб дароварда шудаанд.

Барои аз кабинети инфиродӣ баромадан, довталаб бояд тугмаи “Баромад”-ро пахш намояд.