Душанбе, 27-уми октябри соли 2020
27-уми октябри соли ҷорӣ дар ноҳияи Шаҳринав бо иштироки 250 нафар хатмкунандаи муассисаҳои таълимии таҳсилоти миёнаи умумии ноҳияи мазкур имтиҳони озмоишӣ ташкил ва гузаронида шуд.
Бояд қайд намуд, ки дар мувофиқа бо муассисаҳои таълимӣ хатмкунандагон бо чунин тарз ба гурӯҳи ихтисосҳо тақсимот шудаанд:
- гурӯҳи ихтисосҳои 1-ум (табиӣ ва техникӣ) – 39 нафар хатмкунанда;
- гурӯҳи ихтисосҳои 2-юм (иқтисод ва география) – 23 нафар хатмкунанда;
- гурӯҳи ихтисосҳои 3-юм (филология, педагогика ва санъат) – 47 нафар хатмкунанда;
- гурӯҳи ихтисосҳои 4-ум (ҷомеашиносӣ ва ҳуқуқ) – 18 нафар хатмкунанда;
- гурӯҳи ихтисосҳои 5-ум (тиб, биология ва варзиш) – 123 нафар хатмкунанда.
Имтиҳони озмоишӣ аз тарафи кормандон ва мутахассисони Марказ дар доираи 20 синфхонаи имтиҳонӣ дар муассисаи таълимии таҳсилоти миёнаи умумии № 1 гузаронида шуд. Дар имтиҳони мазкур хатмкунандагони муассисаҳои таълимии №№ 1, 9, 17, 20, 30 ва интернати ҷумҳуриявӣ иштирок доштанд.
Коркарди варақаҳои ҷавобҳо дар Марказ ба таври автоматӣ гузаронида мешавад ва натиҷаи он ба шуъбаи маорифи ноҳияи мазкур бо мақсади таҳлили натиҷаҳо ва муайян намудани сатҳи дониши хатмкунандагон равона карда мешавад. Дар баробари ин, натиҷаҳои имтиҳони озмоишӣ вобаста ба муассисаҳои таълимӣ дар байни падару модарон ва намояндаи шуъбаи маорифи ноҳия баррасӣ карда мешаванд.
