Душанбе, 28-уми майи соли 2015
Ба диққати довталабоне, ки ихтисосҳои филиали Донишгоҳи давлатии Москва ба номи М. В. Ломоносов дар шаҳри Душанберо интихоб кардаанд, расонида мешавад, ки дар асоси муроҷиати ректори донишгоҳи мазкур В. А. Садовничий ба Президенти Ҷумҳурии Тоҷикистон дар бораи нигоҳ доштани тартиби пешинаи қабули донишҷӯён ба филиали донишгоҳ бо назардошти Қонуни Федералии Федератсияи Россия “Дар бораи Донишгоҳи давлатии Москва ба номи М. В. Ломоносов ва Донишгоҳи давлатии Санкт-Петербург” дар мувофиқа бо Ҳукумати Ҷумҳурии Тоҷикистон розигӣ дода шуд, ки довталабони филиали ин донишгоҳ, дар баробари имтиҳонҳои марказонидаи дохилшавӣ (ИМД), дар филиали зикршуда имтиҳони иловагии махсусро супоранд.
Лозим ба қайд аст, ки мувофиқи Қонуни Федералии Федератсияи Россия “Дар бораи Донишгоҳи давлатии Москва ба номи М. В. Ломоносов ва Донишгоҳи давлатии Санкт-Петербург” ба донишгоҳҳои зикршуда ҳуқуқ дода шудааст, ки ҳангоми қабул барои таълим аз рӯйи барномаҳои бакалавриат ва барномаҳои омода кардани мутахассисон аз рӯйи равияҳои таълим (ихтисосҳо), ки ин донишгоҳҳо муайян менамоянд, санҷишҳои иловагии равияи тахассусӣ доир намоянд.
Бинобар ин, довталабони барои иштирок дар ИМД-2015 азқайдгузашта ва ихтисосҳои филиали Донишгоҳи давлатии Москва ба номи М. В. Ломоносов дар шаҳри Душанберо интихобкарда, ки хоҳиши дохил шудан аз рӯйи ихтисосҳои филиалро доранд, бояд имтиҳони иловагии махсус супоранд. Барои супоридани имтиҳони иловагии махсус довталабонро зарур аст, ки аз 1‑ум то 25‑уми июли соли 2015 ба комиссияи қабули филиали донишгоҳи зикршуда муроҷиат намуда, бо пешниҳоди ҳуҷҷатҳои зарурӣ аз қайд гузаранд. Мақсади бақайдгирӣ дар пойгоҳи додаҳои ягонаи довталабони Донишгоҳи давлатии Москва ба номи М. В. Ломоносов ворид кардани маълумоти зарурӣ дар бораи довталабони филиали он дар шаҳри Душанбе аст.
Барои бақайдгирӣ довталаб бояд:
- ариза;
- 6 дона расми 3х4 см;
- маълумотномаи тиббии шакли № 086/У;
- аттестат ё диплом (нусха);
- шиноснома (нусха);
- шаҳодатномаи ҳарбиро пешниҳод намояд.
Тибқи тартиби мувофиқашуда ба имтиҳонҳои иловагии махсуси филиали донишгоҳ мегузаронда танҳо довталабоне роҳ дода мешаванд, ки дар имтиҳонҳои марказонидаи дохилшавӣ аз ҳамаи субтестҳои дахлдор холҳои гузаришро ба даст оварда, аз қайди филиали донишгоҳ гузаштаанд. Довталабоне, ки тибқи натиҷаҳои имтиҳонҳои марказонидаи дохилшавӣ ва имтиҳонҳои иловагии махсус аз рӯйи ин ё он ихтисоси филиали Донишгоҳи давлатии Москва ба номи М. В. Ломоносов дар шаҳри Душанбе қабул мешаванд, бояд дар хусуси даст кашидан аз иштирок дар озмуни тақсимот дар асоси натиҷаҳои имтиҳонҳои марказонидаи дохилшавӣ аз рӯйи ихтисосҳои дар дигар муассисаҳои таълимӣ интихобкардаашон ариза пешниҳод намоянд.
Довталабоне, ки дар имтиҳонҳои марказонидаи дохилшавӣ аз ҳамаи субтестҳои дахлдор холҳои гузаришро ба даст овардаанду лекин аз имтиҳонҳои иловагии махсус ё бақайдгирии филиал нагузаштаанд, барои иштирок дар озмуни тақсимот ба дигар муассисаҳои таълимӣ аз рӯйи ихтисосҳои интихобкардаашон ҳуқуқ доранд.
