Душанбе, 24 июни соли 2013 – Имтиҳонҳои Озмоиши калони низоми нави имтиҳонҳои марказонидашудаи дохилшавӣ ба муассисаҳои таҳсилоти олии касбии Ҷумҳурии Тоҷикистон бо муваффақият ба анҷом расид. Дар давоми 8 рӯз зиёда аз 3851 нафар хонандагон, ки дар давраи бақайдгирӣ аз қайд гузашта буданд, тибқи ҷадвали тасдиқгардида дар имтиҳонҳо иштирок намуданд.
Бояд қайд намуд, ки ҳар як иштирокчӣ дар давоми ду рӯз вобаста ба кластерҳо 3 маротиба имтиҳон (тести умумӣ, кори хаттӣ (эссе) ва тести тахассусӣ) супорид.
Айни замон, аз 7 маркази имтиҳонӣ, ки дар 4 минтақаи ҷумҳурӣ таъсис дода шуда буд, маводди имтиҳонӣ ба Маркази миллии тестӣ ҷамъоварӣ карда шуда, мавриди тафтиш ва коркард қарор дорад. Натиҷаи имтиҳонҳо 1 августи соли ҷорӣ дар сомонаи Маркази миллии тестӣ http://ntc.tj/ эълон карда мешавад.
