Душанбе, 22-юми феврали соли 2018

Одамият чист? - Худро дур аз шар доштан,

Хайрхоҳи халқ будан, нафъи безар доштан.

Муддатест ки дар расонаҳои хабарӣ ва шабакаҳои иҷтимоӣ дар бораи таъсиси ташкилоти наве ба исми "Анҷумани озодандешони тоҷик" валвалаи зиёде бар по намудаанд ва ба ҳар роҳу восита мехоҳанд фикру андешаи ифротии худро дар назди ҷаҳониён солим нишон диҳанд, бехабар аз ин ки мардуми тоҷик ва ҷомеаи ҷаҳонӣ аз нақша ва кору пайкори онҳо бохабаранд. Аввал ин ки ба ташкил додани ин созмон онҳо танҳо номи худро тағйир додаанд, аммо бо ҳамон андеша ва афкори хароби худ амал мекунанд. Ба қавли Унсурмаолии Кайковус “гандумнамои ҷавфурӯш”-анд.

Дувум ин ки вақте аз номи ислом хостанд мардуми шарифи Тоҷикистонро фиреб диҳанд, мардум аз найранги онҳо огоҳ гардид. Ҳоло мехоҳад боз бо ин роҳ мардумро ба гумроҳӣ андозанд. Ва табиист, ки ин бор ҳам муваффақ нахоҳанд шуд, зеро халқ дигар чеҳраи асоси онҳоро шинохт ва нияти нопоки онҳоро дарк намуд.

Сеюм, бояд бо дидаи хирад назар андохт, ки ин ном ба онҳо сазовор ҳаст на? Оё онҳо аз дастгирии мардум бархӯрдор ҳастанд ё на? Оё онҳо бо ин ном дар пайи ободии Ватан ҳастанд, ё дар пайи вайрони Ватан? Оё мардуми шарифи Тоҷикистон фаромӯш кардаанд, ки ин ҳизб ба болояшон чи мусибатҳое овард? Ҳаргиз не! Мардуми Тоҷикистон аз ин ҳизбу ҳаракатҳои ифротӣ безоранд ва ҳаргиз намехоҳанд ки дини поки исломро бо сиёсат омезиш диҳанд, зеро сиёсӣ кардани дин ягон манфиате барои мусалмонон надорад. Чунончи Шайх Саъдӣ мегӯяд:

Ибодат ба ҷуз хидмати халқ нест,

Ба тасбеҳу саҷҷодаву далқ нест.

Мо бояд дар атрофи Пешвои миллат муттаҳид шуда, дар пайи оромӣ ва тинҷии мардум бошем, зеро Худованд кадом миллатеро дӯст дорад, барои он миллат баъди яқин ду неъмати гаронбаҳо - яке амну амният ва дигар пешвои одилу ғамхор ва дурандеш насибу рӯзӣ мегардонад, ки ин ду неъмат алҳамдулиллоҳ дар мамлакати мо пойбарҷост.

Зайниддин Қарчиев,

сархатиби масҷиди ҷомеи марказии н.Қубодиён

Бознашр аз сомонаи Кумитаи оид ба корҳои дин, танзими анъана ва ҷашну маросимҳои миллии назди Президенти Ҷумҳурии Тоҷикистон (http://din.tj/?q=node/650).