Душанбе, 16 ноябри соли 2023
Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон аз оғози фаъолияташон ба ҳайси сарвари давлат тамоми таваҷҷуҳ ва ҷаҳду талошашонро барои рушди илму маорифу фарҳанг, баланд бардоштани ҳисси худогоҳӣ, ватандӯстӣ, арҷгузорӣ аз таъриху фарҳанги ниёгон, эҳёи ҳунарҳои суннатию мардумӣ ва шинохти бузургони миллат равона намуданд.
Ҳамасола бо амри Президенти кишвар муҳтарам Эмомалӣ Раҳмон баргузор гардидани озмуни ҷумҳуриявии “Фурӯғи субҳи доноӣ китоб аст” далели ин гуфтаҳост. Аз ҷумла, соли ҷорӣ аз 2-юми феврал амри Президенти кишвар муҳтарам Эмомалӣ Раҳмон дар бораи баргузории озмуни мазкур содир гардид. Ҳадафи баргузории озмуни ҷумҳуриявии “Фурӯғи субҳи доноӣ китоб аст” баланд бардоштани завқи китобхонӣ, дарёфти чеҳраҳои нави суханвариву сухандонӣ, арҷ гузоштан ба арзишҳои миллию фарҳангӣ ва инкишофи қобилияти эҷодӣ, таҳкими эҳсоси худшиносӣ, ғанӣ гардонидани захираи луғавӣ, тақвияти ҷаҳони маънавӣ ва баландгардонии доираи забондонӣ миёни қишрҳои мухталифи ҷомеа, аз ҷумла хонандагону донишҷӯёни ҳамаи зинаҳои таҳсилот ва шаҳрвандони кишвар мебошад.
Инак соли панҷум аст, ки бо амри Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон озмуни ҷумҳуриявии «Фурӯғи субҳи доноӣ китоб аст» аз рӯйи шаш номинатсия – (1) адабиёти кӯдакон ва наврасон, (2) адабиёти классикии тоҷик, (3) адабиёти муосири тоҷик, (4) адабиёти ҷаҳон, (5) эҷоди назм ва (6) эҷоди наср баргузор мегардад.
Бо ҷамъбасти озмуни ҷумҳуриявии «Фурӯғи субҳи доноӣ китоб аст» сармутахассиси фанни адабиёти тоҷики раёсати таҳияи маводди имтиҳони Марказ Хуршед Эҳсон дар номинатсияи эҷоди наср ғолиби ҷойи дуюм гардид.
Ба ин муносибат 16-уми ноябри соли 2023 дар маҷлисгоҳи Маркази миллии тестии назди Президенти Ҷумҳурии Тоҷикистон ҷаласаи идона баргузор шуд.
Ҷаласа бо сухани директори Марказ Ҷаъфарзода Сабзалӣ оғоз гардид. Ӯ, аз ҷумла қайд кард, ки Хуршед Эҳсон аз мутахассисони кордон ва фаъоли Марказ аст. Ӯ бо дониш ва истеъдоди баландаш дар чунин озмунҳо иштирок намуда, дар бахши “Эҷоди наср” ғолиби ҷойи аввали даври ноҳиявӣ (ноҳияи Исмоили Сомонии шаҳри Душанбе) ва ғолиби ҷойи аввали даври шаҳрии озмуни “Фурӯғи субҳи доноӣ китоб аст” низ гардида буд.
Сардори раёсати таҳияи маводди имтиҳон Азимов Ҷ. дар бораи ҳадафҳои озмуни ҷумҳуриявии «Фурӯғи субҳи доноӣ китоб аст» маъруза кард. Ӯ, аз ҷумла гуфт, ки озмун чунонки аз Низомномаи он бармеояд, бо мақсади баланд бардоштани завқи китобхонӣ, тақвияти неруи зеҳнӣ, дарёфти чеҳраҳои нави суханвару сухандон, арҷ гузоштан ба арзишҳои миллию фарҳангӣ, инкишофи қобилияти эҷодӣ, таҳкими эҳсоси худогоҳию худшиносӣ, такмили захираи луғавӣ, тақвияти ҷаҳони маънавӣ миёни аҳолии кишвар, аз ҷумла хонандагони муассисаҳои таҳсилоти миёнаи умумӣ, хонандагон ва донишҷӯёни муассисаҳои таҳсилоти ибтидоӣ, миёна ва олии касбӣ, баъд аз муассисаҳои таҳсилоти касбӣ (магистрҳо, аспирантҳо, докторантҳо), омӯзгорони ҳамаи зинаҳои таҳсилот, ходимони илмию адабии муассисаҳои илмиву эҷодӣ, фарҳангу санъат, калонсолон, намояндагони касбу кори гуногун ва дигар табақаҳои аҳолии кишвар доир мегардад.
Баъдан бори дигар ҷоизаҳои ғолиби ҷойи аввали даври шаҳрӣ ва ғолиби ҷойи дуюми даври ҷумҳуриявии озмун ба Хуршед Эҳсон супорида шуд.
Директори Марказ таъкид намуд, ки ба Хуршед Эҳсон барои дастовардаш дар озмуни ҷумҳуриявии «Фурӯғи субҳи доноӣ китоб аст» аз номи Марказ мукофотпулӣ ва як роҳхат ба яке аз осоишгоҳҳои ҷумҳурӣ тақдим карда мешавад.
