Душанбе, 21-уми июли соли 2016

Маркази миллии тестии назди Президенти Ҷумҳурии Тоҷикистон ба диққати довталабон ва дигар алоқамандони имтиҳонҳои марказонидаи дохилшавӣ мерасонад, ки феҳристҳои зеринро Вазорати маориф ва илми Ҷумҳурии Тоҷикистон тасдиқ намуд:

1. «Феҳристи ихтисосҳо бо дарназардошти гурӯҳи ихтисосҳо (кластерҳо) ва субтестҳои онҳо, шумораи имконпазири ҳадди аксари бал аз ҳар субтести қисми (компоненти) Б (имтиҳони ихтисос) дар имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбии Ҷумҳурии Тоҷикистон» аз 20‑уми июли cоли 2016, № 2147.

2. «Феҳристи ихтисосҳо ва фанҳои таҳсилоти миёнаи умумии ба онҳо мувофиқаткунандаи олимпиадаҳои ҷумҳуриявию байналмилалӣ, ки аз рӯйи онҳо дар имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбии Ҷумҳурии Тоҷикистон имтиёз дода мешавад» аз 20‑уми июли cоли 2016, № 2144.

3. «Феҳристи ихтисосҳое, ки дастовардҳои довталабон дар соҳаи варзиш ба онҳо мувофиқат карда, аз рӯйи ин дастовардҳо дар имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбии Ҷумҳурии Тоҷикистон имтиёз дода мешавад» аз 20‑уми июли cоли 2016, № 2142.

4. «Феҳристи ихтисосҳое, ки дастовардҳои довталабон дар соҳаи фарҳангу санъат ба онҳо мувофиқат карда, аз рӯйи ин дастовардҳо дар имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбии Ҷумҳурии Тоҷикистон имтиёз дода мешавад» аз 20‑уми июли cоли 2016, № 2143.

Чунонки таҷрибаи ҷаҳонӣ нишон медиҳад, ҳангоми қабули донишҷӯ ба муассисаи таълимӣ мувофиқати дастоварди довталаб ба равияи таълим ё ихтисосҳои интихобкардаи ӯ ба назар гирифта мешавад ва агар ба ӯ барои қабул ба муассисаи таълимии таҳсилоти миёна ё олии касбӣ имтиёз дода шавад, танҳо дар асоси чунин мувофиқат дода мешавад. Ҳамин тариқ, тибқи тартиби муқарраргардида дар имтиҳонҳои марказонидаи дохилшавӣ низ (1) ғолибият дар олимпиадаҳои ҷумҳуриявию байналмилалӣ аз рӯйи фанҳои таълимӣ дар сурати мувофиқат карданаш ба ихтисосҳои интихобкарда, яъне фанни асосии имтиҳонии ихтисос(ҳо)-и интихобкарда ба ҳисоб рафтани он; (2) дастовардҳои довталабон дар соҳаи варзиш/санъату фарҳанг дар сурати ба ихтисосҳои интихобкардаашон мувофиқат кардани ин дастовардҳо ҳамчун асос барои додани имтиёз ба довталаб ба назар гирифта мешавад.

Лозим ба қайд аст, ки тибқи «Феҳристи ихтисосҳо бо дарназардошти гурӯҳи ихтисосҳо (кластерҳо) ва субтестҳои онҳо, шумораи имконпазири ҳадди аксари бал аз ҳар субтести қисми (компоненти) Б (имтиҳони ихтисос) дар имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбии Ҷумҳурии Тоҷикистон» муайян гардидааст, ки дар доираи ҳар як гурӯҳи ихтисосҳо вазн (шумораи имконпазири ҳадди аксари бал)-и ҳар субтест вобаста аз ҳар як ихтисос ба чанд баробар аст.

Феҳристҳои мазкурро Марказ дар мувофиқа бо муассисаҳои таълимӣ таҳия намудааст.