ФЕҲРИСТИ МУВОФИҚАТИ
РАВИЯҲОИ ТАЪЛИМ (ИХТИСОСҲО) БА ФАНҲОИ ОЛИМПИАДАҲО
ВА АТТЕСТАТ (ШАҲОДАТНОМА)-И АЪЛОИ РАВИЯВӢ
Душанбе, 14-уми майи соли 2015
Маркази миллии тестии назди Президенти Ҷумҳурии Тоҷикистон ба диққати довталабон ва дигар алоқамандони имтиҳонҳои марказонидаи дохилшавӣ мерасонад, ки “Феҳристи мувофиқати равияҳои таълим (ихтисосҳо) ба фанҳои олимпиадаҳои ҷумҳуриявию байналмилалӣ, аттестат (шаҳодатнома)-и аълои равияи табиӣ-риёзӣ ва равияи ҷамъиятӣ-гуманитарӣ ва медали тиллою нуқра барои додани имтиёзҳо дар имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбии Ҷумҳурии Тоҷикистон” бо қарори мушовараи Вазорати маориф ва илми Ҷумҳурии Тоҷикистон аз 30‑юми апрели соли 2015, № 11/37 тасдиқ гардид.
Чунонки таҷрибаи ҷаҳонӣ нишон медиҳад, ҳангоми қабули донишҷӯ ба муассисаҳои таълимӣ мувофиқати дастовардҳои довталаб ба равияи таълим (ихтисосҳо)-и интихобкардаи ӯ ба назар гирифта мешавад ва имтиёзи дахлдор ба ӯ дар асоси чунин мувофиқат дода мешавад. Ҳамин тариқ, тибқи тартиби муқарраргардида дар имтиҳонҳои марказонидаи дохилшавӣ низ ғолибият дар олимпиадаҳои ҷумҳуриявию байналмилалӣ аз рӯйи фанҳои таълимӣ дар сурати мувофиқат кардан, яъне фанни асосии имтиҳонии ихтисос(ҳо)-и интихобкарда ба ҳисоб рафтани он ҳамчун асос барои додани имтиёз ба назар гирифта мешавад. Инчунин, дар асоси феҳристи мазкур муайян карда шудааст, ки аттестат (шаҳодатнома)-и аълои равияи табиӣ-риёзӣ ва равияи ҷамъиятӣ-гуманитарӣ ва медали тиллою нуқра ба кадом равияҳои таълим (ихтисосҳо)-и интихобкарда мувофиқат мекунад ва барои додани имтиёзҳо ба довталабони дахлдор дар имтиҳонҳои мазкур ба ҳисоб гирифта мешавад.
Феҳристи мазкур аз тарафи Марказ дар мувофиқа бо муассисаҳои таълимӣ таҳия гардидааст.
Лозим ба қайд аст, ки инчунин “Феҳристи ихтисосҳо бо назардошти гурӯҳи ихтисосҳо (кластерҳо), субтестҳои онҳо ва шумораи имконпазири ҳадди аксари бал аз ҳар субтести имтиҳони қисми Б (имтиҳони ихтисос) барои истифода дар имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбии Ҷумҳурии Тоҷикистон” низ тасдиқ гардид.
