ФЕҲРИСТИ ИХТИСОСҲО

БО НАЗАРДОШТИ ШУМОРАИ ИМКОНПАЗИРИ ҲАДДИ АКСАРИ БАЛ

АЗ ҲАР СУБТЕСТИ ИМТИҲОНИ ҚИСМИ Б (ИМТИҲОНИ ИХТИСОС)

Душанбе, 14-уми майи соли 2015

Маркази миллии тестии назди Президенти Ҷумҳурии Тоҷикистон ба диққати довталабон ва дигар алоқамандони имтиҳонҳои марказонидаи дохилшавӣ мерасонад, ки “Феҳристи ихтисосҳо бо назардошти гурӯҳи ихтисосҳо (кластерҳо), субтестҳои онҳо ва шумораи имконпазири ҳадди аксари бал аз ҳар субтести имтиҳони қисми Б (имтиҳони ихтисос) барои истифода дар имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбии Ҷумҳурии Тоҷикистон” бо қарори мушовараи Вазорати маориф ва илми Ҷумҳурии Тоҷикистон аз 30‑юми апрели соли 2015, № 11/38 тасдиқ гардид.

Тавре ҳангоми корҳои иттилоърасонию таблиғотӣ ва дар маводу мақолаҳои дастурию иттилоотии Марказ баён гардида буд, таносуби бали имконпазири ҳадди аксар (вазн) барои субтестҳои имтиҳони қисми Б (имтиҳони ихтисос) вобаста аз фанни асосии имтиҳони ихтисос дар доираи гурӯҳи ихтисосҳо метавонад гуногун бошад. Дар феҳристи мазкур шумораи имконпазири ҳадди аксари бал аз ҳар як субтести қисми Б (имтиҳони ихтисос) бо назардошти фанҳои имтиҳонии ҳар як ихтисос дар доираи гурӯҳи ихтисосҳо муқаррар шудааст.

Ин феҳристро Марказ дар мувофиқа бо муассисаҳои таълимӣ таҳия кардааст.

Лозим ба қайд аст, ки инчунин “Феҳристи мувофиқати равияҳои таълим (ихтисосҳо) ба фанҳои олимпиадаҳои ҷумҳуриявию байналмилалӣ, аттестат (шаҳодатнома)-и аълои равияи табиӣ-риёзӣ ва равияи ҷамъиятӣ-гуманитарӣ ва медали тиллою нуқра барои додани имтиёзҳо дар имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбии Ҷумҳурии Тоҷикистон” низ тасдиқ гардид.