Душанбе, 12-уми январи соли 2023
12-уми январи соли 2023 ташкилоти ибтидоии Ҳизби Халқии Демократии Тоҷикистон дар ноҳияи Исмоили Сомонӣ «Роҳнамои довталаб» ҷаласаи ҷамъбастӣ-ҳисоботии худро доир кард. Маҷлис дар дафтари асосии Маркази миллии тестии назди Президенти Ҷумҳурии Тоҷикистон баргузор шуда, масъалаи асосиаш натиҷагирӣ аз фаъолияти ташкилот дар соли 2022 буд.
Рӯзномаи ҷаласа, ҳамчунин масъалаҳои омӯзиши Паёми Президенти Ҷумҳурии Тоҷикистон муҳтарам Эмомалӣ Раҳмон «Дар бораи самтҳои асосии сиёсати дохилӣ ва хориҷии ҷумҳурӣ» ба Маҷлиси Олӣ (аз 23.12.2022), тасдиқи Нақшаи кории ташкилоти ибтидоии ҳизбӣ барои соли 2023 ва ғайраро дарбар мегирифт.
Дар ҷаласа, ба ҷуз аъзои ташкилот, инчунин Қурбонзода Убайдулло – раиси Кумитаи иҷроияи ҲХДТ дар ноҳияи Исмоили Сомонӣ ширкат варзид. Раиси ташкилоти ибтидоии Ҳизби Халқии Демократии Тоҷикистон дар ноҳияи Исмоили Сомонӣ «Роҳнамои довталаб», ҳамзамон директори Маркази миллии тестии назди Президенти Ҷумҳурии Тоҷикистон Ҷаъфарзода Сабзалӣ Файзалӣ ба кори маҷлис оғоз бахшида, пас аз сухани ифтитоҳӣ оид ба фаъолияти ташкилоти ибтидоии ҳизбии «Роҳнамои довталаб» дар давоми соли 2022 маърузаи ҳисоботӣ кард.
Ҷаъфарзода С. Ф. дар маърузааш, аз ҷумла қайд кард, ки ташкилоти ибтидоӣ фаъолияти худро дар соли сипаришуда дар асоси Оиннома, Барнома, нақшаи чорабиниҳои Кумитаи иҷроияи марказии ҲХДТ ва ташкилоти ибтидоии ҳизбӣ ва дастуру супоришҳои Асосгузори сулҳу ваҳдати миллӣ, Пешвои миллат, Раиси ҲХДТ муҳтарам Эмомалӣ Раҳмон ба роҳ монда, вазифаҳояшро, бахусус дар робита ба ташвиқу тарғиби ғояҳои оинномавии ҳизб ва ҳадафҳои идеологии он муваффақона ба анҷом расонидааст. Теъдоди аъзои ташкилоти ибтидоии ҳизбӣ аз як давраи ҳисоботӣ то давраи дигар меафзояд. Ба истиснои 1 нафар ҳамаи аъзои ташкилоти ибтидоӣ дорои таҳсилоти олиянд.
Мавсуф тазаккур дод, ки минбаъд низ ташкилоти ибтидоии ҳизбии «Роҳнамои довталаб» дастуру супоришҳои Раиси ҲХДТ муҳтарам Эмомалӣ Раҳмонро роҳнамои кори хеш қарор дода, дар иҷрои вазифаҳояш саъю талош хоҳад варзид.
Вобаста ба масъалаи дувуми ҷаласа – омӯзиши Паёми Президенти Ҷумҳурии Тоҷикистон муҳтарам Эмомалӣ Раҳмон «Дар бораи самтҳои асосии сиёсати дохилӣ ва хориҷии ҷумҳурӣ» ба Маҷлиси Олӣ (аз 23.12.2022) Рустамов Ҷ., сармутахассиси Марказ, сухан гуфта, оид ба ягонагии ғояву ҳадафҳои ҲХДТ ва аҳдофи Президенти Ҷумҳурии Тоҷикистон муҳтарам Эмомалӣ Раҳмон, таҷассуми онҳо дар Паём ва амсоли инҳо ибрози назар кард.
Дар ҷаласа, инчунин вазифаҳои навбатӣ барои фаъолияти минбаъда баррасӣ гардида, нақшаи кории ташкилоти ибтидоии ҳизбӣ барои соли 2023 бо назардошти пешниҳоду таклифҳо тасдиқ карда шуд.
Пиромуни масъалаҳои баррасишуда чанде аз ҳозирин – аъзои ҲХДТ ибрози андеша карданд.
Дар охир, қабл аз хатми ҷаласа, Қурбонзода Убайдулло – раиси Кумитаи иҷроияи ҲХДТ дар ноҳияи Исмоили Сомонӣ аз аъзои ташкилоти ибтидоии Ҳизби Халқии Демократии Тоҷикистон дар ноҳияи Исмоили Сомонӣ «Роҳнамои довталаб» ва раиси он Ҷаъфарзода С. Ф. барои фаъолияти пурсамарашон изҳори ташаккур карда, онро қаноатбахш ва гузашта аз ин, шоистаи таҳсин ва намунаи ибрати ташкилотҳои ҳизбии дигар шуморида, ҳамагонро барои ҷаҳду талошҳои бештар баҳри иҷрои ғояву аҳдофи ҲХДТ даъват кард.
