Душанбе, 30-юми марти соли 2020
Ба диққати довталабоне, ки рамзи воридшавӣ ба кабинети инфиродии худро фаромӯш кардаанд, расонида мешавад, ки хизматрасонии «Барқарорсозии рамзи кабинети инфиродӣ ба воситаи паёмак (SMS)» фаъол гардид.
Шарти асосӣ барои барқарорсозии рамзи кабинети инфиродӣ ба воситаи паёмак (SMS) қайд кардани рақами телефони мобилӣ дар вақти бақайдгирӣ ва фаъол будани ин рақам мебошад.
Барои барқарор кардани рамзи фаромӯшшуда дар равзанаи воридшавӣ ба кабинети инфиродӣ пайванди «Рамзро фаромӯш кардед?»-ро пахш кардан лозим аст, ки дар натиҷаи он равзанаи нави иборат аз ду пайванд: «Ба воситаи почтаи электронӣ» ва «Ба воситаи SMS-паёмак» пайдо мешавад. Довталаб дар ин равзана пайванди «Ба воситаи SMS-паёмак»-ро бояд пахш кунад.
Бо пахши ин пайванд равзанаи иборат аз се майдон: (1) «Рақами назоратӣ», (2) «Телефони мобилӣ» ва (3) «Рамзи санҷишӣ» ва як тугма – «Фиристодан» пайдо мешавад. Довталаб бояд рақами назоратӣ, рақами телефони мобилии дар вақти бақайдгирӣ нишондодааш ва рамзи санҷиширо, ки аз тарафи система ба таври тасодуфӣ тавлид ва дар равзана нишон дода мешавад, дар майдонҳои дахлдор дохил ва тугмаи «Фиристодан»-ро пахш кунад. Сипас рамзи муваққатиро, ки хизматрасонӣ ба рақами телефони мобилии довталаб мефиристад, аз телефони мобилиаш гирифта, бо истифода аз он ба кабинети инфиродиаш медарояд.
Хотиррасон мекунем, ки довталаб рамзи кабинети инфиродиашро ба воситаи почтаи электронӣ низ барқарор карда метавонад. Шарти асосӣ барои барқарорсозии рамзи кабинети инфиродӣ тавассути почтаи электронӣ қайд кардани он дар вақти сабти номи довталаб аст.
Маълумоти муфассалро дар бораи моҳият ва тарзи истифодаи кабинети инфиродии довталаб, аз ҷумла тартиби барқарорсозии рамзи кабинети инфиродӣ ба воситаи почтаи электронӣ ва тарзи воридшавӣ ба кабинети инфиродӣ аз бахши «Кабинети инфиродӣ»-и дастури иттилоотию методии «Роҳнамои довталаб», ки гунаи электронии он дар сомонаи Марказ ҷой дода шудааст, дастрас кардан мумкин аст.
ТАВАҶҶУҲ!
1. Истифода аз хизматрасонии «Барқарорсозии рамзи кабинети инфиродӣ ба воситаи паёмак (SMS)» ройгон аст.
2. Довталаб наметавонад рамзи воридшавиро ба кабинети инфиродиаш бо истифода аз телефони мобилие барқарор созад, ки рақами онро дар вақти бақайдгирӣ нишон надодааст ё онро ҳамчун телефони хона нишон додааст.
3. Дар вақти истифода аз ин хизматрасонӣ рақами назоратӣ, рақами телефони мобилии довталаб ва рамзи санҷишӣ дар майдонҳои дахлдор бояд дуруст ворид карда шаванд.
4. Дар вақти ворид кардани рамзи муваққатие, ки онро система бо паёмак (SMS)-и ҷавобӣ мефиристад, дуруст навиштани он дар майдони дахлдори равзанаи воридшавӣ ба кабинети инфиродӣ бояд риоя карда шавад.
5. Ҳангоми иваз кардани рамзи муваққатӣ дар равзанаи «Ивази рамз» ба номи майдонҳо диққат додан лозим аст: дар майдони «Рамз» рамзи муваққатӣ ва дар майдонҳои «Рамзи нав» ва «Тасдиқи рамзи нав» рамзи нави худро айнан як хел бояд дохил кард.
6. Бо истифода аз рақами кӯтоҳи 1617 ё 989001617, ки солҳои гузашта дар амал буд, барқарорсозии рамзи кабинети инфиродӣ имконнопазир аст.
