ЭЪЛОН

ТАҚСИМОТИ ТАКРОРИИ ДОВТАЛАБОН

Душанбе, 28-уми августи соли 2015

Маркази миллии тестии назди Президенти Ҷумҳурии Тоҷикистон ба диққати довталабоне, ки ба озмуни тақсимоти асосии довталабон (8‑уми август) роҳ ёфта буданду лекин дар озмуни мазкур аз рӯйи ягон ихтисоси интихобкардаашон муваффақ нагардиданд, мерасонад, ки тибқи ҷойҳои дар ихтисосҳои муассисаҳои таълимии таҳсилоти миёна ва олии касбӣ баъд аз тақсимот (‑и асосӣ)-и имтиҳонҳои марказонидаи дохилшавӣ – 2015 холимонда тақсимоти такрории довталабон доир мегардад. Хотиррасон менамоем, довталабоне, ки дар тақсимоти асосӣ аз рӯйи яке аз ихтисосҳои интихобкардаашон ба ин ё он муассисаи таълимӣ гузашта буданд, инчунин довталабоне, ки холҳои гузаришро аз як ё якчанд субтест соҳиб нагардида, ба озмуни тақсимоти асосӣ роҳ наёфта буданд, ҳуқуқи иштирок дар озмуни тақсимоти такрориро надоранд.

Бо мақсади иштирок дар тақсимоти такрорӣ довталаб бояд аз нав аз қайд гузарад. Барои азнавбақайдгирӣ довталабро зарур аст, ки дар яке аз нуқтаҳои азнавбақайдгирӣ, ки рӯйхаташон дар зер оварда шудааст, 18 сомонӣ пардохт намуда, расид (квитансия), шиноснома ва варақаи бақайдгирӣ ё даъватномашро ба бақайдгиранда пешниҳод намояд. Ёдрас менамоем, ки қабули маблағҳо барои иштирок дар тақсимоти такрорӣ бевосита дар нуқтаҳои азнавбақайдгирӣ ба роҳ монда шуда, ятимони кулл ва бепарасторон аз пардохти маблағ озоданд. Азнавбақайдгирӣ рӯзҳои 29‑ум, 30‑юм ва 31‑уми август баргузор шуда, натиҷаҳои озмуни тақсимоти такрорӣ, ки дар асоси натиҷаҳои аз имтиҳонҳо бадастовардаи довталабон доир мегардад, 3‑юми сентябр эълон карда мешаванд.

Мувофиқи тартиби тасдиқнамудаи Вазорати маориф ва илми Ҷумҳурии Тоҷикистон аз 27‑уми августи соли 2015, № 20/1 тақсимоти такрорӣ мувофиқи ихтисосҳое баргузор карда мешавад, ки дар онҳо баъд аз тақсимот (‑и асосӣ)-и имтиҳонҳои марказонидаи дохилшавӣ 15 ё зиёда аз он ҷойи холӣ мондааст.

Рӯйхати ихтисосҳои дорои ҷойҳои холӣ, ки барои тақсимоти такрорӣ пешниҳод гардидаанд, дар сомонаи Марказ ҷойгир карда шудааст. Вобаста ба ин, ҳар як довталаб имкон дорад, ки ихтисосҳои мехостаашро пешакӣ интихоб намояд.

Тақсимоти такрорӣ барои довталабони дахлдори гурӯҳҳои ихтисосҳо (кластерҳо)-и 1-ум, 2-юм, 3-юм ва 4-ум дар доираи гурӯҳҳои ихтисосҳо (кластерҳо)-и интихобкардаашон доир карда мешавад. Яъне, ҳар як довталаб ихтисосҳои дорои ҷойҳои холиро танҳо дар доираи гурӯҳи ихтисосҳо (кластер)-и қаблан интихобнамудааш метавонад интихоб намояд, ба истиснои довталабони гурӯҳи ихтисосҳо (кластер)-и 5‑ум.

Дар тақсимоти такрорӣ ихтисосҳои гурӯҳи ихтисосҳо (кластер)-и 5-ум, ба истиснои ихтисосҳои 1030201 – “Тарбияи ҷисмонӣ” ва 1880201 – “Фаъолияти варзишии омӯзгорӣ”-и Донишкадаи тарбияи ҷисмонии Тоҷикистон ба номи С. Раҳимов пешниҳод намегарданд.

Бинобар ин, ба довталабони гурӯҳи ихтисосҳо (кластер)-и 5-ум, ки аз субтестҳои дахлдори қисмҳои А (имтиҳони умумӣ) ва Б (имтиҳони ихтисос) холҳои гузаришро соҳиб шудаанд, ҳуқуқ дода шудааст, ки ихтисосҳои дорои ҷойҳои холиро аз гурӯҳи ихтисосҳо (кластер)-и 1-ум интихоб намоянд.

Довталабони гурӯҳи ихтисосҳо (кластер)-и 5-ум, ки аз субтестҳои дахлдори қисми А (имтиҳони умумӣ) ва имтиҳони маҳорати махсуси Донишкадаи тарбияи ҷисмонии Тоҷикистон ба номи С. Раҳимов (минбаъд – Донишкада) холҳои гузаришро соҳиб шуда, аз субтестҳои қисми Б (имтиҳони ихтисос) холҳои гузаришро ба даст наовардаанд ё дар имтиҳони қисми мазкур иштирок накардаанд, новобаста аз навъи имтиҳонҳои маҳорати махсуси супоридаашон, метавонанд танҳо ихтисосҳои дорои ҷойҳои холии Донишкадаро, ки барои тақсимоти такрорӣ пешниҳод гардидаанд, интихоб намоянд.

Довталабони гурӯҳҳои ихтисосҳо (кластерҳо)-и 1-ум, 2 юм, 3 юм ва 4-ум, ки аз субтестҳои дахлдори қисми А (имтиҳони умумӣ) ва имтиҳонҳои эҷодӣ ва маҳорати махсус холҳои гузаришро соҳиб шуда, аз субтестҳои қисми Б (имтиҳони ихтисос) холҳои гузаришро ба даст наовардаанд ё дар имтиҳони қисми мазкур иштирок накардаанд, метавонанд дар доираи гурӯҳҳои ихтисосҳо (кластерҳо)-и интихобкардаашон танҳо ихтисосҳои дорои ҷойҳои холиеро интихоб намоянд, ки супоридани имтиҳонҳои эҷодӣ ва маҳорати махсусро талаб менамоянд.

Тақсимоти такрорӣ барои довталабони дахлдори гурӯҳҳои ихтисосҳо (кластерҳо)-и 2-юм, 3-юм ва 4-ум дар асоси натиҷаҳои имтиҳонҳояшон (балҳои бадастовардаашон) аз субтестҳои дахлдори қисмҳои А (имтиҳони умумӣ) ва Б (имтиҳони ихтисос) ва имтиҳонҳои эҷодӣ ва маҳорати махсус (агар ихтисос супоридани чунин имтиҳонҳоро талаб мекарда бошад) гузаронида мешавад.

Тақсимоти такрорӣ барои довталабони дахлдори гурӯҳҳои ихтисосҳо (кластерҳо)-и 1-ум ва 5-ум, ки ҳуқуқи интихоб кардани ихтисосҳо аз гурӯҳи ихтисосҳо (кластер)-и 1-умро доранд, дар асоси балҳои бадастовардаашон аз субтестҳои дахлдори қисми А (имтиҳони умумӣ) гузаронида мешавад.

Тақсимоти такрорӣ барои довталабони дахлдори гурӯҳҳои ихтисосҳо (кластерҳо)-и 1-ум, 2-юм, 3-юм ва 4-ум, ки ҳуқуқи интихоб кардани ихтисосҳоеро доранд, ки супоридани имтиҳонҳои эҷодӣ ва маҳорати махсусро талаб мекунанд, дар доираи гурӯҳи ихтисосҳо (кластер)-и интихобкардаашон дар асоси балҳои дар имтиҳонҳо аз субтестҳои дахлдори қисми А (имтиҳони умумӣ) ва имтиҳонҳои эҷодӣ ва маҳорати махсус бадастовардаашон гузаронида мешавад.

Бори дигар ба ҳамаи довталабоне, ки дар озмуни тақсимоти асосӣ муваффақ нагардидаанд ва хоҳиши иштирок дар озмуни тақсимоти такрориро доранд, муроҷиат менамоем, ки ҳангоми интихоби ихтисосҳо, муассисаҳои таълимӣ, шакл ва намуди таҳсил ба шитобкорӣ роҳ надода, онҳоро дуруст ва мувофиқи донишу қобилият ва имкониятҳояшон интихоб намоянд.

РӮЙХАТИ

нуқтаҳои азнавбақайдгирии довталабон барои иштирок дар тақсимоти такрории имтиҳонҳои марказонидаи дохилшавӣ дар соли 2015