Душанбе, 14-уми апрели соли 2016

Ба иттилои шахсоне, ки барои иштирок дар имтиҳонҳои марказонидаи дохилшавӣ-2016 аз қайд гузаштан мехоҳанд, мерасонем, ки бо назардошти дархосту муроҷиатҳои шаҳрвандон ва серодаму зиёд будани навбат дар нуқтаҳои бақайдгирӣ муҳлати бақайдгирӣ (даври асосӣ) то  30-юми апрел тамдид карда шуд.

Инчунин, тибқи ҷадвали тасдиқгардида аз 16‑ум то 30‑юми апрел даври 1‑уми азнавбақайдгирии довталабон баргузор мегардад. Вобаста ба ин, дар давраи аз 16‑ум то 30‑юми апрел раванди бақайдгирӣ ва азнавбақайдгирӣ ҳамзамон ба роҳ монда мешавад.

Довталабоне, ки аз қайд гузаштаанду хоҳиши иваз кардани интихобҳои аввалия ё маълумоти шахсии худро доранд, бояд ба нуқтаи бақайдгирие муроҷиат карда, ҳуҷҷатҳои зарурии дар зер номбаршударо пешниҳод намоянд, ки қаблан дар он сабти ном шудаанд. Агар довталаб дар яке аз нуқтаҳои сайёри бақайдгирӣ аз қайд гузашта бошад, бояд мувофиқан ба яке нуқтаҳои бақайдгирии дахлдор, ки рӯйхаташон дар сомонаи Марказ ҷойгир гардидааст, муроҷиат намояд.

Хотиррасон менамоем, ки дар мувофиқа бо Хадамоти зиддиинҳисории назди Ҳукумати Ҷумҳурии Тоҷикистон арзиши хизматрасонӣ барои даври 1‑уми азнавбақайдгирӣ 20 сомонӣ муқаррар карда шудааст.

Барои маълумоти бештар метавонед бо телефонҳои 224-53-66, 224-53-67, 224-53-68 дар тамос шавед.

Ҳуҷҷатҳои зарурӣ барои азнавбақайдгирӣ:

1. шиноснома ё ҳуҷҷати тасдиқкунандаи шахсият бо сурат, ки мақоми ваколатдори давлатӣ додааст;

2. варақаи бақайдгирии даври асосии бақайдгирӣ;

3. расиди пардохти маблағи иловагӣ дар яке аз филиалҳои Бонки давлатии амонатгузории Ҷумҳурии Тоҷикистон “Амонатбонк”.