Натиҷаҳои олимпиадаи фаннии ҷумҳуриявии хонандагони муассисаҳои таҳсилоти миёнаи умумӣ аз фанҳои равияи ҷамъиятӣ-гуманитарӣ

Душанбе, 8-уми апрели соли 2015

Рӯзи 4-уми апрели соли 2015 дар бинои гимназия-парваришгоҳи ба номи Бобоҷон Ғафурови ноҳияи Рӯдакӣ олимпиадаи фаннии ҷумҳуриявии хонандагони муассисаҳои таҳсилоти миёнаи умумӣ аз фанҳои равияи ҷамъиятӣ-гуманитарӣ баргузор гардид. Дар олимпиадаи мазкур дониши иштирокдорон аз фанҳои забон ва адабиёти тоҷик, забони давлатӣ (тоҷикӣ), забони русӣ, забони англисӣ, таърих ва асосҳои давлат ва ҳуқуқ (ҳуқуқи инсон) санҷида шуд.

Натиҷаҳои ниҳоии олимпиада 5-уми апрели соли 2015 ҷамъбаст гардида, 61 нафар ҳамчун ғолибони ҷойҳои 1-ум, 2-юм ва 3-юм эътироф гардиданд. Ҷойҳои 1-ум ва 2-юмро 16-нафарӣ ва ҷойҳои 3-юмро 29 нафар ишғол намуданд, ки аз ин шумора вобаста ба муассисаҳои таълимии типи муқаррарӣ ҷойҳои 1-умро 9 нафар, 2-юмро 8 нафар ва 3-юмро 14 нафар ва вобаста ба муассисаҳои таълимии типи нав (литсей, гимназияҳо, мактаб-литсейҳои Президентӣ) ҷойҳои 1-умро 7 нафар, 2-юмро 8 нафар ва 3-юмро 15 нафар ишғол намуданд.

Марказ, чун дар имтиҳонҳои марказонидаи дохилшавӣ ҳангоми баргузории олимпиадаҳои ҷумҳуриявии фаннӣ низ фаъолияти худро дар асоси принсипҳои воқеият (объективӣ) дар санҷишу баҳогузорӣ, шаффофияту мустақилияти равандҳои баргузории озмунҳо, таъмини дастёбии баробар ба олимпиада ва истифодаи васеи техникаю технологияи муосир ба роҳ монда, тамоми чораҳои дахлдорро барои дар сатҳи зарурӣ баргузор кардани онҳо андешида истодааст.

Лозим ба қайд аст, ки корҳои ташкил ва баргузории олимпиадаҳоро Марказ дар ҳамкории бевосита бо Вазорати маориф ва илми Ҷумҳурии Тоҷикистон ба роҳ мондааст.

Тибқи тартиби муқарраргардида олимпиада дар намуди тест ва кори хаттӣ баргузор шуда, натиҷаҳои он 5-уми апрели соли 2015 эълон гардид. Пас аз эълони натиҷаҳо бо мақсади таъмини ҳуқуқҳои иштирокдорон барои арзёбии воқеӣ (объективӣ)-ии донишашон ва ҳалли масъалаҳои баҳсталаби марбут ба натиҷаҳои имтиҳонҳо ба онҳо иҷозат дода шуд, ки дар сурати норозӣ будан аз натиҷаҳои ба онҳо гузошташуда аризаи апеллятсионӣ пешниҳод намоянд.

Аз рӯйи таҳлили муқоисавии вилоят ва минтақаҳо иштирокдорон аз вилояти Суғд 19 ҷой (ҷойи 1-ум 6 нафар, 2-юм 7 нафар ва 3-юм 6 нафар), шаҳри Душанбе 17 ҷой (ҷойи 1-ум 3 нафар, 2-юм 5 нафар ва 3-юм 9 нафар), вилояти Хатлон 15 ҷой (ҷойи 1-ум 4 нафар, 2-юм 3 нафар ва 3-юм 8 нафар), Вилояти Мухтори Кӯҳистони Бадахшон ва ноҳияҳои тобеи ҷумҳурӣ 5-ҷойиро ишғол намуданд.