Комбинатсияҳои ихтисосҳое, ки тибқи онҳо баъд аз озмуни тақсимоти асосии имтиҳонҳои марказонидаи дохилшавӣ мувофиқи нақшаи қабули донишҷӯён ҷойҳои холӣ мондаанд ва дар озмуни тақсимоти такрорӣ пешниҳод карда мешаванд

Душанбе, 18-уми августи соли 2017

Комбинатсияҳои ихтисосҳое, ки тибқи онҳо баъд аз озмуни тақсимоти асосии имтиҳонҳои марказонидаи дохилшавӣ ҷойҳои холӣ мондаанд, муайян ва барои интихоби довталабон пешниҳод мегардад. Ёдрас менамоем, ки ба озмуни тақсимоти такрорӣ комбинатсияи ихтисосҳое пешниҳод карда мешавад, ки аз рӯйи онҳо нақшаи қабули донишҷӯён иҷро нагардида, ҷойҳои холӣ мондаанд (аз ҷумла, бо сабабҳои сари вақт аз қайди муассисаи таълимии ба он дохилшудаашон нагузаштани довталабони комёбгардида ё аз таҳсил даст кашидани чунин донишҷӯён).

Рӯйхатҳои комбинатсияҳои ихтисосҳои зикршуда дар сомонаи Марказ гузошта шуд.

Ба довталабон тавсия дода мешавад, ки бо комбинатсияҳои ихтисосҳое, ки дар озмуни тақсимоти такрорӣ пешниҳод мешаванд, тавассути сомонаи Марказ пешакӣ шинос шуда, дар интихоби онҳо, бахусус муайян кардани бартарии интихобҳо, шакли таҳсил (рӯзона, ғоибона, шабона, фосилавӣ), намуди таҳсил (ройгон, пулакӣ), муассисаҳои таълимӣ (донишгоҳ, донишкада, коллеҷ) ва макони ҷойгиршавии онҳо ба шитобкорӣ ва хато роҳ надиҳанд. Инчунин, комбинатсияи ихтисосҳоро бо дарназардошти бали умумии аз имтиҳонҳо бадастовардаашон интихоб намоянд. Хотиррасон менамоем, ки азнавбақайдгирии довталабон барои иштирок дар озмуни тақсимоти такрорӣ аз 19-ум то 22-юми август сурат гирифта, натиҷаҳои озмуни тақсимоти такрорӣ, ки дар асоси балҳои қаблан бадастовардаи довталабон доир карда мешавад, 26-уми август эълон карда мешавад.

Лозим ба қайд аст, ки аз рӯйи баъзе комбинатсияи ихтисосҳое, ки таваҷҷуҳи довталабон ба онҳо зиёд аст, имкони баланд шудани озмун вуҷуд дорад ва ин боиси он мегардад, ки довталаби бали камтардошта, агар чунин комбинатсияи ихтисосҳоро интихоб карда бошад, дар озмуни тақсимоти такрорӣ низ комёб нагардад. Лозим ба ёдоварист, ки дар гурӯҳи ихтисосҳои 1-ум (табиӣ ва техникӣ) ва 2-юм (иқтисод ва география) шумораи нисбатан зиёди ҷойҳои холӣ вуҷуд дорад ва ба довталабони гурӯҳҳои ихтисосҳои 3‑юм (филология, педагогика ва санъат), 4-ум (ҷомеашиносӣ ва ҳуқуқ) ва 5-ум (тиб, биология ва варзиш) имкон дода мешавад, ки дар сурати аз гурӯҳҳои ихтисосҳои пештар интихобкардаашон даст кашидан ихтисосҳои ҷойҳои холидоштаро аз гурӯҳи ихтисосҳои 1-ум (табиӣ ва техникӣ) ё 2-юм (иқтисод ва география) интихоб кунанд. Озмуни тақсимоти такрорӣ барои ихтисосҳои гурӯҳи 1-ум (табиӣ ва техникӣ) ва 2-юм (иқтисод ва география), ба истиснои ихтисосҳое, ки супоридани қисми А (имтиҳони умумӣ) ва қисми В (имтиҳонҳои эҷодӣ ва маҳорати махсус)-ро талаб мекунанд, дар асоси балҳои умумии танҳо аз қисми А (имтиҳони умумӣ) бадастовардаи довталабон доир карда мешавад.

Вобаста аз намуд ва гурӯҳи ихтисосҳо тақсимоти довталабон аз рӯйи комбинатсияи ихтисосҳои интихобкардаашон дар асоси балҳои умумии зерин анҷом дода мешавад:

- бали умумие, ки аз ҷамъи балҳои аз субтетҳои қисми А ва бали аз ҳисоби имтиёз (дар сурати доштани чунин имтиёз) бадастовардаи довталаб ҳосил шудааст – дар доираи гурӯҳи ихтисосҳои 1-ум (табиӣ ва техникӣ) ва 2-юм (иқтисод ва география) барои ихтисосҳое, ки супоридани қисмҳои А ва Б-ро талаб мекунанд;

- бали умумие, ки аз ҷамъи балҳои аз қисмҳои А ва Б, инчунин бали аз ҳисоби имтиёз ё коэффитсиент (дар сурати доштани чунин имтиёз) бадастовардаи довталаб ҳосил шудааст – дар доираи гурӯҳҳои ихтисосҳои 3-юм (филология, педагогика ва санъат), 4-ум (ҷомеашиносӣ ва ҳуқуқ) ва 5-ум (тиб, биология ва варзиш) барои ихтисосҳое, ки супоридани қисмҳои А ва Б-ро талаб мекунанд;

- бали умумие, ки аз ҷамъи балҳои аз қисмҳои А ва В, инчунин бали аз ҳисоби имтиёз (дар сурати доштани чунин имтиёз) бадастовардаи довталаб ҳосил шудааст – дар доираи ҳамаи гурӯҳҳои ихтисосҳо барои ихтисосҳое, ки супоридани қисмҳои А ва В-ро талаб мекунанд;

- бали умумие, ки аз ҷамъи балҳои аз қисмҳои А, Б ва Г, инчунин бали аз ҳисоби имтиёз (дар сурати доштани чунин имтиёз) бадастовардаи довталаб ҳосил шудааст – дар доираи ҳамаи гурӯҳҳои ихтисосҳо барои ихтисосҳое, ки супоридани қисмҳои А, Б ва Г-ро талаб мекунанд.