Душанбе, 10-уми августи соли 2016

Ба диққати довталабоне, ки тибқи натиҷаҳои озмуни тақсимоти асосӣ (3‑юми августи соли 2016) аз рӯйи яке аз комбинатсияи ихтисосҳои интихобкардаашон комёб гардидаанд, мерасонем, ки бояд на дертар аз 15‑уми август ба муассисаи таълимии таҳсилоти миёна (коллеҷ) ё олии касбӣ (донишгоҳ/донишкада)‑е, ки ба он тақсим гардидаанд, ҳозир шаванд ва ҳуҷҷатҳои заруриро ба комиссияи қабули он пешниҳод карда, аз қайд гузаранд.

Тибқи тартиб дар сурати бо сабабҳои узрнок дар муҳлати муқарраргардида имконнопазир будани ҳозиршавии довталаб ба муассисаи таълимӣ, довталабро зарур аст, ки сари вақт то 15‑уми август муассисаи таълимиро дар ин хусус тавассути намояндаи худ хабардор карда, ҳуҷҷатҳои заруриро пешниҳод намояд.

Хотиррасон менамоем, ки тибқи тартиби муқарраргардида, дар сурати сари вақт то 15‑уми август ба муассисаи таълимии таҳсилоти миёна ё олии касбии дахлдор ҳозир нашудани довталаб ва ҳуҷҷатҳои заруриро пешниҳод накарданаш ӯ аз ҳуқуқи қабул шудан ба муассисаи таълимӣ маҳрум мегардад ва ҷойҳои аз ин ҳисоб холимонда дар озмуни тақсимоти такрорӣ пешниҳод карда мешаванд. Чунин довталаб дар озмуни тақсимоти такрорӣ ҳуқуқи иштирокро надорад.

Лозим ба қайд аст, ки комиссияи қабули муассисаҳои таълимӣ рӯзҳои шанбею якшанбе низ кор мекунад ва довталабони комёбгардида дар ин рӯзҳо низ ҳуҷҷатҳои худро пешниҳод карда, аз қайд гузашта метавонанд.

Ҳуҷҷатҳои зарурие, ки довталабони дар озмуни тақсимот комёбгардида бояд ба муассисаҳои таълимии таҳсилоти миёна ва олии касбии дахлдор пешниҳод намоянд, инҳоянд:

1) ариза ба номи ректор;

2) ҳуҷҷат дар бораи таҳсилот (диплом ё аттестат);

3) маълумотномаи тиббӣ (шакли 086-у);

4) 6 адад сурат (андозаи 3х4 см);

5) маълумотнома аз ҷойи зист;

6) шиноснома (асл) ё ҳуҷҷати тасдиқкунандаи шахсият бо сурат, ки аз тарафи мақоми ваколатдори давлатӣ додааст;

7) билети ҳарбӣ (агар дошта бошад) ё шаҳодатномаи ҳарбии даъватшаванда;

8) нусхаи дафтарчаи меҳнатӣ (агар собиқаи корӣ дошта бошад).