Душанбе, 29-уми апрели соли 2016
Ба диққате шахсоне, ки барои иштирок дар имтиҳонҳои марказонидаи дохилшавӣ-2016 аз қайд гузаштан мехоҳанд, расонида мешавад, ки муҳлати бақайдгирӣ (даври асосӣ) 30‑юми апрел ба итмом мерасад.
Ҳамзамон иттилоъ медиҳем, ки тибқи тартиби муқарраргардида довталабоне, ки аз қайд гузаштаанду вале бо сабабҳои гуногун дар имтиҳонҳои марказонидаи дохилшавӣ иштирок карда наметавонанд, аз иштирок дар имтиҳонҳо даст кашидан мехоҳанд ё барои азнавбақайдгирӣ маблағ пардохт кардаанду вале аз нав аз қайд нагузаштаанд ва шахсоне, ки маблағи хизматрасонӣ барои иштирок дар имтиҳонҳои марказонидаи дохилшавиро пардохт кардаанду вале аз қайд нагузаштаанд, барои баргардонидани маблағҳо бояд дар муҳлати муқарраргардида – на дертар аз 14‑уми май ба Марказ ариза пешниҳод намоянд.
Ҷиҳати баргардонидани маблағи пардохтшуда шахсоне, ки аз бақайдгирӣ/азнавбақайдгирӣ нагузаштаанд расид ва довталабони азқайдгузашта, ки аз иштирок дар имтиҳонҳо даст кашидан мехоҳанд ё имкони иштирок дар онҳоро надоранд, варақаи бақайдгириро низ бояд пешниҳод намоянд.
Пешакӣ огоҳ менамоем, ки аз 16‑уми май равандҳои дигари банақшагирифтаи омодагӣ ба имтиҳонҳо бо назардошти шумораи довталабони азқайдгузашта оғоз мегардад ва ин имкон намедиҳад, ки минбаъд маблағҳои пардохтшуда барои шахсони дар боло зикргардида, чӣ бо тартиби муқаррарӣ ва чӣ бо тартиби истисноӣ (ба ғайр аз ҳолатҳои ғайричашмдошт, ки аз довталаб вобастагӣ надоранд), баргардонида шавад.
Агар довталаб аз иштирок дар имтиҳонҳо даст кашидан хоҳад ё барои иштирок дар имтиҳонҳо имконият надошта бошад ва ба Марказ барои бозпас гирифтани маблағи пардохтшуда аз муҳлати муқаррарнамуда дер муроҷиат намояд, маблағи пардохтшуда, ба истиснои ҳолатҳои ғайричашмдошт, ки аз довталаб вобастагӣ надоранд ва бо ҳуҷҷатҳо тасдиқ гардидаанд, баргардонида намешавад.
