Маркази миллии тестии назди Президенти Ҷумҳурии Тоҷикистон ба таваҷҷуҳи довталабоне, ки дар имтиҳонҳои марказонидаи дохилшавӣ иштирок намудаанд, мерасонад, ки натиҷаҳои имтиҳонҳои қисми А ва Б вобаста ба кори анҷомдодаи ҳар як довталаб 1 август дар ҳуҷраҳои инфиродии довталабон гузошта мешавад.

Ҳамзамон ёдовар мешавем, ки ҷиҳати таъмини шаффофият марказ варақаҳои ҷавобҳои довталабони дар имтиҳонҳо иштирокдоштаро низ қаблан дар ҳуҷраҳои инфиродӣ гузошта буд.

Дар баробари натиҷаҳои имтиҳонҳо, инчунин балли шкалабандишуда, холи гузариши фаннии субтести ҳар як қисм (компонент)-и имтиҳон, хол ва балли имтиҳонҳои эҷодӣ ва маҳорат (барои довталабоне, ки ихтисосҳои марбут бо соҳаи санъат, варзиш, динӣ ва ба ҳамин монандро интихоб намуда, имтиҳон супоридаанд) ва баллҳои имтиёзӣ (барои довталабони имтиёздор тибқи тартиб) низ дар ҳуҷраҳои инфиродии довталабон гузошта мешавад.

Вобаста ба пешниҳоди аризаҳои апеллятсионӣ аз довталабон хоҳиш карда мешавад, ки ҳангоми пур кардани шакли ариза (Шакли АН/Б) маълумоти заруриро ба таври дақиқ ва хоно қайд намуда, фақат он қисматеро пур намоянд, ки ба довталаб дахл дорад, яъне қисмати “Аризадиҳанда/довталаб пур мекунад!”. Хотиррасон менамоем, ки дуруст ва хоно пур кардани шакли аризаи апеллятсионӣ аз тарафи довталаб худ як навъ далели дорои дониш будани довталаб аст.

Комиссияи апеллятсионӣ тибқи тартиб дар дафтари асосии Маркази миллии тестии назди Президенти Ҷумҳурии Тоҷикистон (шаҳри Душанбе, хиёбони Рӯдакӣ 192) фаъолият менамояд ва аризаҳои пешниҳоднамудаи довталабонро тибқи Низомнома то 9 рӯз баррасӣ намуда, довталабонро аз натиҷаҳои баррасӣ огоҳ менамояд.

Арзиаи апеллятсионӣ вобаста ба хоҳиши довталаб, ки оид ба он дар ариза низ қайд карда мешавад, (1) дар ҳузури довталаб (ва намояндаи ӯ), (2) дар ҳузури намояндаи довталаб ва (3) бе довталаб (ва намояндаи ӯ) мавриди баррасӣ қарор дода мешавад. Қайд кардан ба маврид аст, ки новобаста аз се ҳолати зикргардидаи баррасӣ аризаҳои апеллятсионӣ тибқи тартиби муқарраргардида баррасӣ шуда, қарорҳои дахлдор аз тарафи комиссияи апеллятсионӣ ба таври одилона ва шаффоф қабул гардида, натиҷаҳои баррасӣ ба аризадиҳандаҳо дастрас карда мешаванд. Вобаста ба ин, ҷиҳати пешниҳод ва баррасии аризаи апеллятсионӣ довталабон метавонанд, ки шакли аризаи апеллятсиониро аз сомонаи расмии марказ дарёфт ва чоп намоянд, пас аз пур кардан бе зарурати омадан ба дафтари асосии марказ тавассути почтаи электронии Этот адрес электронной почты защищен от спам-ботов. У вас должен быть включен JavaScript для просмотра., шуъбаҳои минтақавии марказ (нишониҳои онҳо дар зер оварда шудаанд) ё бо намояндаи худ ба комиссияи апеллятсионӣ пешниҳод намояд.

Аз теъдоди умумии довталабони иштирокдошта 29 597 нафар холҳои гузариши фанниро аз рӯйи қисм (компонент)‑ҳои А ва Б ба даст оварданд. Тибқи тартиби муқарраргардида ба довталабоне, ки холҳои гузариши фанниро ҳамаи субтестҳои қисм (компонент)‑ҳои А ва Б ба даст овардаанд, барои иштирок дар озмуни тақсимоти довталабон ба ихтисосҳои интихобнамудаашон тибқи нақшаи қабули донишҷӯён ба муассисаҳои таҳсилоти олии касбии Ҷумҳурии Тоҷикистон роҳ дода мешавад.

Бояд қайд кард, ки ба ин ё он ихтисос гузаштани довталаб, дар баробари холҳои гузариш, инчунин аз теъдоди умумии довталабони дар ихтисос сабтиномшуда вобастагӣ дошта, дар сурати аз миқдори ҷойҳои нақшавии ихтисос зиёд будани довталабон, тибқи тартиб дар асоси озмун дар навбати аввал довталабони дорои баллҳои калонтарин ба ихтисос тақсим карда мешаванд, яъне ба тартиби аз балли болотарин ба поён. Тақсимоти довталабон аз рӯйи нақша аз 15 август, яъне пас аз давраи апеллятсия пешбинӣ гардида, довталабони холҳои гузариши фанниро бадастоварда дар сурати гузаштан ба ин ё он ихтисос маълумоти заруриро аз ҳуҷраҳои инфиродии худ дарёфт карда метавонанд. Ҳамчунин, рӯйхатҳои довталабони тақсимшуда вобаста ба ихтисосу муассисаҳои таҳсилоти олии касбӣ аз тарафи марказ омода гардида, баъд аз 15 август ба муассисаҳои дахлдор ирсол карда мешавад.

Дар асоси таҳлилҳои пешакии натиҷаҳои имтиҳонҳо бо мақсади таъмини иҷрои нақшаи қабули донишҷӯён ба муассисаҳои таълимиии таҳсилоти олии касбӣ дар соли таҳсили 2014-2015 аз тарафи мушовараи Вазорати маориф ва илми Ҷумҳурии Тоҷикистон аз 31.07.2014, №16/4 қарор “Дар бораи гузаронидани тақсимоти такрории довталабон ба муассисаҳои таълимии таҳсилоти олии касбӣ дар асоси натиҷаҳои имтиҳонҳои марказонидаи дохилшавӣ” қабул гардидааст.

Тибқи қарори мазкур дар ҳолати дар муассисаҳои таълимии таҳсилоти олии касбӣ холӣ мондани ҷойҳои ҷудошудаи нақшавӣ баъди тақсимоти асосӣ дар асоси натиҷаҳои имтиҳони умумии қисми А (забони тоҷикӣ,  математика, таърихи ҳалқи тоҷик ва асосҳои давлат ва ҳуқуқ) новобаста аз гурӯҳҳои ихтисосҳо (кластерҳо) тақсимоти такрории довталабони хоҳишманде гузаронида мешавад, ки  аз фанҳои таълимии мазкур холи гузаришро ба даст овардаанд. 

Тақсимоти такрорӣ аз 25 август ба нақша гирифта шуда, вобаста ба он марказ маълумоти заруриро дар бораи ҷойҳои холии нақшавӣ ба довталабон мерасонад. Барои иштирок дар озмуни тақсимоти такрорӣ ба довталабони хоҳишманди холҳои гузаришро ноилгардида зарур аст, ки пас аз эълони ҷойҳои холӣ ариза пешниҳод намуда, аз нав сабти ном шаванд. Маълумоти муфассалро дар ин хусус марказ баъдтар дар сомонаи расмии худ ҷойгир намуда, тавассути воситаҳои ахбори омма низ хабари эълони дахлдорро интишор менамояд.

Тақсимоти довталабон бо назардошти баллҳои бадастовардаю интихобҳои онҳо ва нақшаи қабули донишҷӯён ба таври худкор тавассути Системаи иттилоотии “Довталаб”, яъне бе дахолати омили инсонӣ гузаронида мешавад.

Ёдовар мешавем, ки бо қарори мушовараи Вазорати маориф ва илми Ҷумҳурии Тоҷикистон аз 31.07.2014, №16/1 “Дар бораи муқаррар намудани холҳои гузариши фаннӣ дар имтиҳонҳои марказонидаи дохилшавӣ ба муассисаҳои таълимии таҳсилоти олии касбии Ҷумҳурии Тоҷикистон дар соли таҳсили 2014-2015” холҳои гузариши фаннӣ барои қисм (компонент)‑ҳои А ва Б дар доираи 5 гурӯҳи ихтисосҳо (кластер) муқаррар гардид.

Тибқи қарори мазкур холҳои гузариши фаннӣ ба тартиби зер аст:

Холҳои гузариши фаннии имтиҳони умумии қисми А барои гурӯҳҳои ихтисосҳо (кластерҳо)-и 1 – табиӣ ва техникӣ, 2 – иқтисодӣ ва география ва 3 – филология, педагогика ва санъат