Душанбе, 24-уми июни соли 2021
Маркази миллии тестии назди Президенти Ҷумҳурии Тоҷикистон бори дигар хабар медиҳад, ки муҳлати пешниҳоди ариза дар бораи баргардонидани маблағи барои хизматрасонӣ дар ИМД пардохта барои довталабоне, ки тибқи квотаи Президенти Ҷумҳурии Тоҷикистон ба муассисаҳои таълимӣ дохил шудаанд, то 30-юми июн муқаррар гардидааст.
Мувофиқи тартиби муқарраргардида, агар довталаб бинобар ба муассисаи таълимии таҳсилоти олии касбӣ тибқи квотаи Президенти Ҷумҳурии Тоҷикистон дохил шуданаш дар имтиҳонҳо иштирок карда натавониста, маблағи пардохтаашро баргардонидан хоҳад, ӯ бояд ба Марказ ё бахши минтақавии он бо ариза (хаттӣ бо истифода аз шакли АБМ-2) дар бораи баргардонидани ин маблағ муроҷиат намояд. Ба ариза варақаи бақайдгирӣ ва ҳуҷҷати дахлдори тасдиқкунандаи ҳолати зикршуда бояд замима карда шаванд. Ариза тибқи тартиби муқарраргардида баррасӣ карда мешавад ва аз маблағи пардохтшуда 1 % ҳаққи хизматрасонии Бонк ва 25 сомонӣ барои хароҷоти бақайдгирӣ, инчунин, агар азнавбақайдгириро гузашта бошад, 25 сомонии дигар барои хароҷоти ин марҳала боздошта шуда, маблағи боқимонда дар давоми 1,5 моҳ ба довталаб баргардонида мешавад.
Дар ариза оид ба баргардонидани маблағи барои хизматрасонӣ пардохтшуда бояд маълумоти шахсии аризадиҳанда ва сабаб барои баргардонидани маблағ, имзои аризадиҳанда ва таърихи пешниҳоди ариза қайд гардида, ба он ҳуҷҷат(ҳо)-и дахлдор замима карда шаванд. Дар зарурат чунин аризаро хешованди наздики довталаб метавонад пешниҳод намояд.
Довталаби тибқи квотаи Президенти Ҷумҳурии Тоҷикистон ба муассисаи таълимӣ дохилшуда, ки маблағи барои хизматрасонӣ дар ИМД пардохтаашро баргардонидан мехоҳад, бояд ҳамчун ҳуҷҷати тасдиқкунанда маълумотномаро аз раёсат ё шуъбаи маорифи шаҳр ё ноҳияи дахлдор пешниҳод кунад, ки дар он воқеияти дохилшавии довталаб тибқи квотаи мазкур ба муассисаи таълимӣ тасдиқ шудааст.
