Душанбе, 3-юми апрели соли 2021
Имрӯз, 3-юми апрел дар муассисаи таълимии давлатии "Мактаби байналмилалии Президентӣ" дар шаҳри Душанбе даври ҷумҳуриявии олимпиадаҳои фаннӣ баргузор гардида истодааст.
Олимпиадаи мазкур фанҳои ҷамъиятӣ-гуманитарӣ (забони давлатӣ, забон ва адабиёти тоҷик, забони русӣ, забон ва адабиёти рус, забони англисӣ, таърих, ҳуқуқи инсон)-ро дарбар гирифта, дар он 579 нафар хонанда аз 318 муассисаи таълимии 61 шаҳру ноҳияи ҷумҳурӣ ширкат меварзанд.
Маврид ба ёдоварист, ки Маркази миллии тестии назди Президенти Ҷумҳурии Тоҷикистон рӯзҳои 27-ум - 28-уми марти соли 2021 даври ҷумҳуриявии олимпиадаҳои фанниро барои хонандагони синфи 11-и муассисаҳои таълимии таҳсилоти миёнаи умумӣ аз фанҳои табиӣ-риёзӣ баргузор кард. Дар он 414 нафар хонанда аз 247 муассисаи таълимии 59 шаҳру ноҳияи ҷумҳурӣ иштирок доштанд.
