Душанбе, 11-уми феврали соли 2025
Маркази миллии тестии назди Президенти Ҷумҳурии Тоҷикистон дар ҳамкорӣ бо Вазорати маориф ва илми Ҷумҳурии Тоҷикистон вохӯриҳои кормандони Марказро бо хатмкунандагони муассисаҳои таълимии таҳсилоти умумии асосӣ, миёнаи умумӣ, ибтидоӣ ва миёнаи касбии шаҳру ноҳияҳои ҷумҳурӣ, падару модарон, омӯзгорон ва алоқамандони дигари низоми имтиҳонҳои марказонидаи дохилшавӣ (ИМД) барои соли 2025 баргузор кард.
Аз 3-юм то 11-уми феврали соли ҷорӣ 40 нафар корманди Марказ барои ташкилу баргузории вохӯриҳо ба 68 шаҳру ноҳияи ҷумҳурӣ сафарбар карда шуданд. Тибқи нақша, дар ин муддат аз тарафи кормандони Марказ дар 278 муассисаи таълимӣ вохӯриҳо дар доираи курсҳои шиносоӣ бо низоми ИМД доир карда шуд.
Курсҳои мазкур бо мақсади шиносоӣ бо низоми имтиҳонҳои марказонидаи дохилшавӣ дар соли 2025 бо хатмкунандагони муассисаҳои таълимии таҳсилоти миёнаи умумӣ ва ибтидоию миёнаи касбӣ ва омӯзгорон дар се сатҳ: ҷумҳуриявӣ, шаҳрию ноҳиявӣ ва муассисаҳои таълимӣ ташкилу баргузор карда шуд.
Бояд қайд кард, ки дар давоми моҳҳои феврал ва марти соли ҷорӣ дар 3816 муассисаи таълимии шаҳру ноҳияҳои ҷумҳурӣ аз тарафи таблиғгарон барои огоҳии алоқамандон бо низоми ИМД мунтазам вохӯрию семинарҳо доир карда мешавад.
Бо мақсади ошноӣ пайдо кардани аҳли ҷомеа, бахусус хатмкунандагон, кормандони раёсату шуъбаҳои маорифи шаҳру ноҳияҳои ҷумҳурӣ ва мақомоти иҷроияи ҳокимияти давлатӣ бо низоми ИМД, Марказ онҳоро ба таври ройгон бо маводди иттилоотию методӣ, аз ҷумла дастури иттилоотию методии “Роҳнамои довталаб” ва маҷмуаи саволу масъалаҳои тест таъмин менамояд.
