Душанбе, 28-уми октябри соли 2023

29-уми октябри соли 2023 даври сеюми иловагии имтиҳонҳои марказонидаи дохилшавӣ барои довталабони аз рӯйи ихтисосҳои нав ва ё ихтисосҳои дорои ҷойҳои холии чанде аз коллеҷҳои ҷумҳурӣ худро номнавискарда баргузор мешавад. Дар ин даври имтиҳон, ҳамчунин довталабони аз рӯйи ихтисосҳои дорои ҷойҳои холӣ ва ё ихтисосҳои нав аз Донишгоҳи миллии Тоҷикистон худро бақайдгирифтае, ки рӯзи 22‑юми октябри соли ҷорӣ иштирок карда натавонистанд, ширкат меварзанд.

Ёдовар мешавем, ки даври сеюми иловагии номнависии довталабони коллеҷҳои дорои ихтисосҳои нав ё ҷойҳои холӣ тибқи баъзе аз ихтисосҳо аз 10‑ум то 19-уми октябри соли ҷорӣ давом карда, ин муҳлат боз то 22-юми октябр тамдид карда шуд. Рӯйхати нуқтаҳои бақайдгирии таъсисёфта дар шаҳру ноҳияҳои ҷумҳурӣ дар сомонаи Марказ ба нашр расида буд.

Коллеҷҳои  дорои  ихтисосҳои нав ва ё ихтисосҳои дорои ҷойҳои холӣ, ки довталабонашон дар имтиҳонҳои даври мазкур иштирок мекунанд, инҳоянд: Коллеҷи омӯзгории шаҳри Турсунзода, Коллеҷи тиббии ноҳияи Бобоҷон Ғафуров (ғайридавлатӣ), Коллеҷи тиббии шаҳри Конибодом, Коллеҷи тиббии шаҳри Бохтар, Коллеҷи тиббӣ-иҷтимоии шаҳри Левакант (ғайридавлатӣ) ва филиали ин коллеҷ дар шаҳри Норак, Коллеҷи тиббии ҷумҳуриявӣ, Коллеҷи тиббии шаҳри Ваҳдат, Коллеҷи сайёҳӣ ва хизматрасониҳои иҷтимоии шаҳри Хуҷанд, Коллеҷи омӯзгории ноҳияи Зафаробод, Коллеҷи тиббии шаҳри Кӯлоб (ғайридавлатӣ), Коллеҷи тиббии Донишгоҳи давлатии тиббии Хатлон дар ноҳияи Данғара, Коллеҷи тиббии хусусӣ дар ноҳияи Муъминобод (ғайридавлатӣ), Коллеҷи тиббии ноҳияи Фархор (ғайридавлатӣ), Коллеҷи саноат ва хизматрасониҳои иҷтимоии шаҳри Левакант ва Коллеҷи омӯзгорӣ-муҳандисӣ дар ноҳияи Ҷайҳун (ғайридавлатӣ).

Барои баргузории имтиҳони мазкур 12 маркази имтиҳонӣ дар пойтахти ҷумҳурӣ ва шаҳру ноҳияҳои дигар ташкил карда шуд, ки рӯйхаташ дар зер оварда мешавад.

Ба рақами телефони мобилии ҳар довталаб дар бораи замону макони имтиҳонсупориаш паёмак (SMS) фиристода шуд. Агар бо сабабе довталаб ин паёмакро дарёфт накарда бошад, бояд барои иттилоъгирӣ тавассути телефонҳои 224 53 67 ва ё 224 53 68 бо Марказ дар тамос шавад.

Довталабон бояд на дертар аз соати 11:00 дар маркази имтиҳонии дахлдор ҳозир шаванд.

Риояи шарту талаботи барои имтиҳонҳо муқарраршуда, аз ҷумла инҳо, барои довталабон ҳатмӣ аст:

1. Бо худ овардани ҳуҷҷату ашёи зерин:

- шиноснома ё ҳуҷҷати дигари тасдиқкунандаи шахсият (бо муҳр ва сурат), ки мақоми ваколатдори давлатӣ додааст;

- 2 дона ручкаи одии рангаш сиёҳ (рангҳои дигар иҷозат дода намешавад, зеро варақаи ҷавобҳои бо рангҳои дигар қайдшуда аз ҷиҳати технологӣ дуруст коркард намешавад);

Довталаб метавонад дар зарфи шаффоф барои худ оби нӯшокӣ оварад.

2. Овардани ашёи зерин қатъиян манъ аст:

- ҷузвдон, китоб, ҳар гуна навиштаҳо, дафтар, маводди иттилоотӣ;

- телефони мобилӣ ва дигар таҷҳизоту воситаҳои алоқа ва ҳисоббарор (калкулятор, ноутбук, планшет ва ғайра).

РӮЙХАТИ

муассисаҳои таълимие, ки дар заминаи онҳо рӯзи 29-уми октябри соли 2023 марказҳои имтиҳонӣ барои баргузории даври 3-юми иловагии имтиҳонҳои

марказонидаи дохилшавӣ ба муассисаҳои таълимии таҳсилоти миёна ва олии касбии Ҷумҳурии Тоҷикистон ташкил карда мешаванд