Душанбе, 30-юми марти соли 2018
Дар маҷлисгоҳи Маркази миллии тестии назди Президенти Ҷумҳурии Тоҷикистон бо иштироки кормандони Марказ ҷаласа баргузор гардид. Рӯзномаи маҷлис ба татбиқи Қонуни Ҷумҳурии Тоҷикистон “Дар бораи масъулияти падару модар дар таълиму тарбияи фарзанд” робита дошт. Дар ҷаласа Раиси Кумитаи сохтори давлатӣ ва худидоракунии маҳаллии Маҷлиси намояндагони Маҷлиси Олии Ҷумҳурии Тоҷикистон, доктори илмҳои ҳуқуқшиносӣ, профессор Холиқзода Абдураҳим Ғаффор иштирок кард.
Ҷаласаро Х. Икромӣ, директори Марказ, ифтитоҳ карда, дар бораи аҳамияти Қонуни Ҷумҳурии Тоҷикистон “Дар бораи масъулияти падару модар дар таълиму тарбияи фарзанд” дар ҷомеаи имрӯза, зарурати тақвиятбахшии корҳо барои татбиқи ин қонун сухан гуфт. Ӯ, аз ҷумла, зикр кард, ки барои ҷалби таваҷҷуҳи хатмкунандагони муассисаҳои таълимии таҳсилоти миёнаи умумӣ ва зинаҳои дигари таҳсилот, падару модарон ва омӯзгорон ба нуктаҳои Қонун дар “Дар бораи масъулияти падару модар дар таълиму тарбияи фарзанд” ва дар ин замина тарғиби илму дониш ва омӯзиши касбу ҳунар, ки дар оянда бо шарофати он тавонанд зиндагии барои худу наздиконашон шоистаро фароҳам биёранд, вазифаи ҳар узви ҷомеа аст.
Холиқзода Абдураҳим Ғаффор, аз ҷумла, қайд намуд, ки ҳар падару модар имрӯз фарзандони худро бояд дар рӯҳияи эҳтироми волидайн ва арзишҳои миллӣ, пос доштани расму ойини ниёгон ва ҳифзи Ватану миллати хеш тарбия кунанд. Падару модарон бояд пайваста бикӯшанд, ки аз таълими фарзандони худ дар муассисаҳои таълимӣ бохабар бошанд, рафтори онҳоро таҳти назорат бигиранд, рисолати хешро дар таълиму тарбияи фарзандон ба ҷо оранд, то ки онҳо дар оянда дар ҷомеа мақоми шоиста ёфта, номбардори волидон ва ватану миллати худ гарданд.
