Душанбе, 28-уми майи соли 2015
Маркази миллии тестии назди Президенти Ҷумҳурии Тоҷикистон бори дигар ба иттилои довталабоне, ки ихтисосҳои самтҳои санъат, варзиш, дизайн, меъморӣ, ҳайкалтарошӣ ва диниро, ки супоридани имтиҳонҳои эҷодӣ ва маҳорат (ИЭМ)-ро талаб мекунанд, интихоб намудаанд, мерасонад, ки ИЭМ-ро комиссияҳои имтиҳонӣ (фаннӣ)-и муассисаҳои таълимӣ баргузор менамоянд.
Довталабон бояд пеш аз оғози ИЭМ (то 20‑уми июни соли 2015) ба назди комиссияи қабули муассисаи таълимии интихобнамудаашон барои машварат ҳозир гардида, аз тартибу талабот ва нақшаи баргузории ин имтиҳонҳо огоҳ шаванд.
Имтиҳонҳои эҷодӣ ва маҳорат бевосита дар муассисаҳои таълимии дахлдор пеш аз имтиҳонҳои қисмҳои А (имтиҳони умумӣ) ва Б (имтиҳони ихтисос) аз 20-ум то 30-юми июн баргузор мегардад. Тибқи тартиб Марказ рӯйхати довталабонеро, ки бояд чунин имтиҳонҳоро супоранд, дар доираи ихтисосҳои дахлдор ба муассисаҳои таълимӣ пешниҳод менамояд ва муассисаҳои таълимӣ дар асоси рӯйхатҳои пешниҳодгардида ҷадвали баргузории ИЭМ-ро тартиб дода, довталабони дахлдорро хабардор мекунанд.
Хотиррасон менамоем, ки рӯйхати муассисаҳои таълимие, ки ба низоми имтиҳонҳои марказонидаи дохилшавӣ шомиланд, дар сомонаи Марказ ҷой дода шудааст. Маълумоти заруриро дар бораи ин муассисаҳои таълимӣ, аз ҷумла нишонӣ ва шумораи телефонҳоро барои тамос метавонед аз рӯйхати мазкур дастрас намоед.
Вобаста аз ин, ба довталабоне, ки ихтисосҳои ИЭМ талабмекардаро интихоб намудаанд, тавсия медиҳем, ки то муҳлати муқарраргардида бо комиссияҳои қабули муассисаҳои таълимии интихобкардаашон дар тамос шуда, дар бораи нақшаи баргузории ИЭМ маълумот гиранд.
