Душанбе, 16-уми ноябри соли 2022
Ҳадаф аз ҷамъомади кунунии мо қайд, ёдоварӣ ва бузургдошти 2 сана, 2 рӯзи барои халқу миллати тоҷик басо муҳим ва таърихӣ аст, ки ҳамчун ид арҷгузорию таҷлил карда мешавад. Инҳо Иҷлосияи 16-уми Шӯрои Олии Ҷумҳурии Тоҷикистон ва Рӯзи Президенти Ҷумҳурии Тоҷикистон ҳастанд, ки дар саросари мамлакат ҷашн гирифта мешаванд.
16-уми ноябр ба рӯзи оғози ҷаласаи тақдирсози 16-уми Шӯрои Олӣ, ҳамзамон ба Рӯзи Президент рост меояд. Ин рӯз барои мову шумо, барои халқу миллати тоҷик басо муборак аст. Ин рӯзест барои тоҷикон мубораку фархундаю фараҳзо, зеро маҳз дар ҳамин рӯз – 16-уми ноябри соли 1992 дар шаҳри Хуҷанд Иҷлосияи XVI Шӯрои Олии Ҷумҳурии Тоҷикистон ба кори худ оғоз карда, то 2-юми декабр идома ёфт.
Бо чунин суханони директори Маркази миллии тестии назди Президенти Ҷумҳурии Тоҷикистон Ҷаъфарзода Сабзалӣ Файзалӣ ҷаласаи мутантан дар маҷлисгоҳи дафтари асосии ин Марказ 15-уми ноябри соли 2022 кушода шуд. Ин ҳамоиш ба муносибати Иҷлосияи 16-уми Шӯрои Олӣ ва Рӯзи Президенти Ҷумҳурии Тоҷикистон бо иштироки кормандони Марказ ва муовини раиси Кумитаи илм, маориф ва сиёсати ҷавонони Маҷлиси намояндагони Маҷлиси Олии Ҷумҳурии Тоҷикистон Маликзод Парвина Иноят баргузор гардид.
Ҷаъфарзода С.Ф. ҳозиринро ба муносибати 30-солагии Иҷлосияи XVI Шӯрои Олии Ҷумҳурии Тоҷикистон ва Рӯзи Президенти Ҷумҳурии Тоҷикистон таҳният гуфта, оид ба нақши тақдирсози Иҷлосияи мазкур ва хидмату талошҳои Президенти Ҷумҳурии Тоҷикистон барои истиқрори сулҳу салоҳ ва барқарорсозии сохти конститутсионии мамлакат сухан гуфт. Ӯ аз ҷумла қайд кард, имрӯз барои халқу миллати тоҷик басо муборак, таърихӣ, мондагор аст. Иҷлосияи 16-уми Шӯрои Олии Ҷумҳурии Тоҷикистон дар барқарорсозии сохти конститутсионии мамлакат, бунёди давлатдории Тоҷикистон, ки демокративу ҳуқуқбунёд, дунявию ягона аст, воқеан ва бидуни ягон шакку шубҳа нақше дорад хеле барҷаста ва бесобиқа, яъне барои халқу миллати тоҷик тақдирсоз. Ин Иҷлосия нахустин шарту шароитро барои замина гузоштан дар ваҳдату ризоияти миллӣ, сулҳи тоҷикон фароҳам овард. Халқи тоҷик маҳз бо шарофати Иҷлосияи номбурда аркони давлатдориро дар мамлакат барқарор кард, пояҳои соҳибистиқлолии давлатро таҳким бахшид.
Дар симои вакили халқ муҳтарам Эмомалӣ Раҳмон шахси муносибу арзандаи роҳбари давлатро дида тавонистани вакилони халқ барои мардуми азияткашидаи тоҷик дар он давраи ҳассос бахту толеи баланд буд. Маҳз Иҷлосияи ХVI таҳти роҳбарию раёсати дурандешонаю хирадмандонаи Раиси тозаинтихоби Шӯрои Олии Ҷумҳурии Тоҷикистон ва ҳамзамон Сарвари давлат тамоми масъулиятро дар назди миллат, ҷамъият, давлат ва башарият бар зимма гирифта, самти тараққиёти минбаъдаи мамлакатро муайян кард ва стратегияи аз буҳрони сиёсӣ, иқтисодӣ, фарҳангӣ ва маънавӣ баровардани кишварро ба миён гузошт.
Мо аз хидматҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар бахши илму маориф хуб огаҳем. Ҳамчунин, мову шумо аз таваҷҷуҳи шоёни Президенти мамлакат дар роҳандозии низоми нави имтиҳонсупорӣ ва дастгириҳояшон дар фаъолияти Маркази миллии тестии назди Президенти Ҷумҳурии Тоҷикистон воқифем.
Мо ва умуман, ҳар як тоҷику тоҷикистониро мебояд баҳри арҷгузории Иҷлосияи таърихии 16-уми Шӯрои Олӣ ва ҳифзи дастовардҳое, ки ба шарофати он ва ҷидокорию бедорхобию талошҳои фаровони Президенти Ҷумҳурии Тоҷикистон муҳтарам Эмомалӣ Раҳмон ҳосил шудааст, дар атрофи Пешвои миллат муттаҳид гардида, барои ободию пешрафти бештари кишвари азизамон ҳамеша худро масъул ҳис карда, ҷаҳду талош намоем, – гуфт директори Марказ Сабзалӣ Файзалӣ.
Сипас, сармутахассиси фанни таърихи Марказ Зарифов Н.Ҳ. дар мавзуи «Нақши Иҷлосияи XVI Шӯрои Олии Ҷумҳурии Тоҷикистон дар таҳкими истиқлоли давлатӣ» маъруза кард. Ӯ аз ҷумла қайд кард, ки Иҷлосияи шонздаҳум аз лиҳози моҳияти худ ба Эъломияи истиқлолияти Тоҷикистон баробарарзиш аст. Иҷлосия бо тақозои таърих на танҳо истиқлолияти тоза бадастомадаро наҷот дод, балки тақдири ояндаи Тоҷикистони соҳибистиқлолро муайян карда, барои эҷоди ҷомеаи мутамаддин ва давлати рушдёфта замина гузошт.
Баъдан муовини раиси Кумитаи илм, маориф ва сиёсати ҷавонони Маҷлиси намояндагони Маҷлиси Олии Ҷумҳурии Тоҷикистон Маликзод П.И. аҳли нишастро ба муносибати ҷашни пешорӯ табрик гуфта, аз нақши барои халқи тоҷик таърихию тақдирсози Иҷлосияи ХVI Шӯрои Олии Ҷумҳурии Тоҷикистон аз хидматҳои фарзанди фарзонаи миллат, марди шуҷоъ муҳтарам Эмомалӣ Раҳмон ба ҳайси Раиси Шӯрои Олии Ҷумҳурии Тоҷикистон ва баъдан Президенти Ҷумҳурии Тоҷикистон ёдовар шуд.
Сипас чанде аз кормандони Маркази миллии тестии назди Президенти Ҷумҳурии Тоҷикистон ба музокира баромада, пиромуни мавзуъҳои ироашуда ибрози назар карданд.
Дар хатми ҷаласа директори Марказ Ҷаъфарзода С.Ф. ҳозиринро ба муносибати 30-солагии Иҷлосияи XVI Шӯрои Олии Ҷумҳурии Тоҷикистон ва Рӯзи Президенти Ҷумҳурии Тоҷикистон боз як бор шодбош гуфта, таъкид кард, ки таҷлили Рӯзи Президент дар кишвар аз самимияту эҳтиром ва ифтихори баланди миллии шаҳрвандон дарак медиҳад. Ин баёнгари он аст, ки сокинони мамлакат хизматҳои таърихии Пешвои миллатро қадршиносӣ мекунанд, ба ҷонфидоиҳои ин абармард арҷ мегузоранд.
