Душанбе, 6-уми июли соли 2023
5-уми июли соли ҷорӣ намояндагони Прокуратураи генералии Ҷумҳурии Тоҷикистон – муовини сардори Раёсати назорати иҷрои қонунҳо оид ба ноболиғон ва ҷавонон Одиназода Саид ва прокурори раёсати мазкур Наботов Мироҷиддин аз марказҳои имтиҳонии Маркази миллии тестии назди Президенти Ҷумҳурии Тоҷикистон шаҳри Душанбе боздид намуданд.
Ҳадаф аз ин боздид, пеш аз ҳама, назорати риояи тартиби муқарраркардаи Ҳукумати Ҷумҳурии Тоҷикистон дар рафти имтиҳонҳо, шароити барои имтиҳонсупории довталабон фароҳамовардашуда ва огоҳонидани шахсони масъули дар ин раванд ҷалбшуда оид ба пешгирӣ аз амалҳои номатлуб буд.
Ҳангоми суҳбат бо шахсони масъули дар рафти имтиҳонҳо ҷалбшуда намояндагони Прокуратураи генералӣ дар бораи аҳаммияти имтиҳонҳои марказонидаи дохилшавӣ (ИМД) дар соҳаи маорифи кишвар, риояи талаботу қоидаҳои муқарраргардида дар раванди имтиҳонҳо, пешгирӣ аз амалҳои номатлубу қаллобӣ, андешидани чораҳо барои дар сатҳи зарурӣ баргузор кардани имтиҳонҳо таъкид карданд.
Инчунин, таъкид карда шуд, ки Марказ бояд барои дар сатҳи зарурӣ ва бо рияои қатъии тартиби муқарраркардаи Ҳукумати Ҷумҳурии Тоҷикистон баргузор кардани ИМД тамоми чораҳои заруриро андешида, шаффофияту адолатро аз муҳимтарин усули кори худ қарор дода, онро дар ҳамаи раванду марҳалаҳои ИМД таъмин намояд. Дониш ва малакаю маҳорати ҳар яке аз довталабон воқеӣ (объективона) арзёбӣ карда, ҳеҷ гоҳ ба дахолати инсонӣ (аз берун), тақаллуб ва амалҳои ба ин монанд дар ИМД роҳ дода нашавад. Барои пешгирӣ аз ҳар гуна амалҳои номатлуб дар раванди ИМД тамоми тадбирҳои зарурӣ андешида шавад.
