Душанбе, 1-уми марти соли 2024
1-уми марти соли 2024 Ҷаъфарзода Сабзалӣ, директори Маркази миллии тестии назди Президенти Ҷумҳурии Тоҷикистон, барои ифтитоҳи нуқтаи бақайдгирии довталабон (№ 01/05), ки дар заминаи муассисаи таълимии таҳсилоти миёнаи умумии № 100-и н. Шоҳмансури пойтахт таъсис дода шудааст, дидан кард.
Директори Марказ довталабонро бо оғози давраи якум (асосӣ)-и номнависӣ барои иштирок дар имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбии Ҷумҳурии Тоҷикистон (ИМД) дар соли 2024 шодбош гуфта, ба онҳо дар бораи масъалаҳои муҳимми имтиҳонҳои мазкур, бахусус бақайдгирии довталабон, маълумоту тавсияҳо дод.
Ӯ таъкид кард, ки Маркази миллии тестии назди Президенти Ҷумҳурии Тоҷикистон тамоми имкониятҳоро барои иштироки довталабон дар ИМД фароҳам овардааст. Барои омодагии довталабон, аз ҷумла хизматрасонии “Худро бисанҷ” ва маҷмуаҳои намунаи саволу масъалаҳои тестӣ, метавонад ёрирасон бошад. Агар довталаб танҳо ба дониш, маҳорат ва малакаи худ такя намуда, аз имкониятҳои фароҳамовардаи Марказ истифода кунад, дар ИМД ҳатман муваффақ мешавад.
Директори Марказ вобаста ба давра, тартибу қоидаҳои имтиҳонҳо, интихоби дурусти ихтисосҳо, имтиёзҳои пешбинигардида ба довталабон ва мавзуъҳои дигари марбут ба ИМД суханронӣ намуд.
Баъдан Ҷаъфарзода Сабзалӣ бо намояндагони ВАО-и кишвар низ доир ба ИМД-2024 суҳбат кард. Ӯ дар ин рӯз барои шиносоӣ бо шароитҳои кории кормандон дар нуқтаҳои бақайдгирии дигар ноҳияҳои шаҳри Душанбе низ дидан намуда, бо кормандони нуқтаҳои бақайдгирӣ ва довталабон суҳбат кард.
