Душанбе, 27-уми феврали соли 2023

Маркази миллии тестии назди Президенти Ҷумҳурии Тоҷикистон бо мақсади осон кардани кори довталабон барои интихоби ихтисосҳо, ки рӯйхати онҳо бояд ба нуқтаи бақайдгирӣ пешниҳод карда шавад, барномаи “Интихоби ихтисос”-ро таҳия кард. Барномаи мазкур, ки яке аз навгониҳо дар соли ҷорӣ мебошад, дар ду гуна: (1) мобилӣ – барои истифода дар телефонҳои ҳушманд (смартфон) ва (2) компютерӣ – барои истифода дар компютерҳо омода гардидааст. Барномаро барои истифода дар телефонҳои ҳушманд (смартфон https://play.google.com/store/apps/details?id=com.companyname.specializationselect&pli=1) аз мағозаи интернетии Google Play ва барои истифода дар компютерҳо (https://ntc.tj/images/file/IntikhobiIkhtisos.zip) аз сомонаи Марказ боргирӣ кардан мумкин аст.

Хотиррасон мекунем, ки соли ҷорӣ феҳристи комбинатсияҳои ихтисосҳо дар дастури иттилоотию методии “Роҳнамои довталаб”, ки онро Марказ дар шакли чопӣ ба муассисаҳои таълимӣ ройгон дастрас гардонидааст, ҷой дода нашудааст. Аз ин лиҳоз, ба шахсони хоҳишманди иштирок дар имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбии Ҷумҳурии Тоҷикистон (ИМД) тавсия медиҳем, ки барои интихоби ихтисосҳо аз барномаи мазкур истифода намоянд.

Равзанаи барномаи “Интихоби ихтисос” аз унсурҳои зерин иборат аст:

• майдони интихоби гурӯҳи ихтисосҳо;

• майдони интихоби зинаи таҳсил (синфи 9-ум ё 11-ум);

• майдони интихоби ихтисос (ин майдон пас аз интихоби гурӯҳи ихтисосҳо ва зинаи таҳсил фаъол мегардад);

• майдони ҷустуҷӯй;

• майдони интихоби шакли таҳсил (рӯзона, шабона, фосилавӣ ё ғоибона). Ин майдон низ пас аз интихоби гурӯҳи ихтисосҳо ва зинаи таҳсил фаъол мегардад;

• майдони интихоби намуди таҳсил (ройгон ё пулакӣ). Ин майдон пас аз интихоби гурӯҳи ихтисосҳо, зинаи таҳсил ва шакли таҳсил фаъол мегардад;

• майдони интихоби муассисаи таълимӣ. Ин майдон пас аз интихоби гурӯҳи ихтисосҳо, зинаи таҳсил, шакли таҳсил ва намуди таҳсил фаъол мегардад;

• рӯйхати ихтисосҳо барои интихоб кардан. Пас аз интихоби гурӯҳи ихтисосҳо ва зинаи таҳсил дар ин рӯйхат ҳамаи комбинатсияҳои ихтисосҳое, ки барои гурӯҳи ихтисосҳо ва зинаи таҳсили интихобшуда пешбинӣ гардидаанд, намоиш дода мешавад. Бо интихоби майдонҳои дигар (интихоби ихтисос, шакли таҳсил, намуди таҳсил ва муассисаи таълимӣ) гузинаҳо – маълумоти ин рӯйхат маҳдудтар мешавад. Бо пахш кардани чоркунҷаи ранги пасзаминааш кабуди дорои аломати ҷамъ (“+”), ки дар рӯбарӯйи ҳар як комбинатсияи ихтисос ҷойгир аст, дар рӯйхати поёнӣ ихтисосҳои интихобкарда пайдо хоҳад шуд;

• рӯйхати ихтисосҳои интихобкарда. Комбинатсияи ихтисоси интихобкардаро аз ин рӯйхат бо пахш кардани чоркунҷаи ранги пасзаминааш сурхи дорои аломати тарҳ (“‑”), ки дар рӯбарӯйи ҳар як комбинатсияи ихтисос ҷойгир аст, ҳазф кардан мумкин аст;

• тугмаи сабти рӯйхати ихтисосҳои интихобкарда дар қолаби ҳуҷҷати қобили интиқол (PDF).

Пас аз интихоби комбинатсияҳои ихтисосҳо довталаб бояд рӯйхати онҳоро дар қолаби ҳуҷҷати интиқолпазир (PDF) сабт кунад. Ба довталабон тавсия дода мешавад, ки барои бақайдгирӣ рӯйхати мазкурро дар шакли чопӣ пешниҳод кунанд. Агар довталаб чунин имконро надошта бошад, ба нуқтаи бақайдгирӣ шакли дастнависи онро метавонад пешниҳод кунад.

Фаромӯш набояд кард, ки ҳар кас бояд ихтисосеро интихоб кунад, ки ба имконияту қобилияташ мувофиқ бошад. Ҳангоми интихоби ихтисос ба шакли таҳсил (рӯзона, шабона, ғоибона, фосилавӣ), намуди таҳсил (ройгон, пулакӣ) ва макони ҷойгиршавии муассисаи таълимӣ диққат додан хеле муҳим аст. Зеро ихтисосҳои зиёде ҳастанд, ки аз рӯйи шаклу намуди гуногуни таҳсил дар чандин муассисаи таълимӣ пешниҳод карда мешаванд.

Довталаб бояд, пеш аз ҳама, олами маънавии худ − шавқу ҳавас, меҳру садоқат ба касбу ихтисос, тафаккур ва қобилияту истеъдодашро ба назар гирад. Сипас бо ихтисосҳои мавҷудае, ки майли интихоби онҳоро дорад, шинос шуда, хусусияту талаботи онҳоро фаҳмида, лаёқату донишу тавону имкони худро ба эътибор гирифта, онҳоро ихтиёр кунад. Танҳо дар ҳамин сурат интихоби касбу ихтисос дурусту дақиқ ва бошуурона буда метавонад.

Новобаста аз барномаи “Интихоби ихтисос”, гунаи ниҳоии феҳристи комбинатсияҳои ихтисосҳое, ки тибқи нақша аз рӯйи онҳо бояд дар соли таҳсили 2023-2024 тавассути ИМД донишҷӯён ба муассисаҳои таълимии таҳсилоти миёна ва олии касбӣ қабул карда шаванд, дар сомонаи Марказ дар шакли ҷадвал бо имкони интихоби гурӯҳи ихтисосҳо ва муассисаи таълимӣ ҷойгир карда шудааст. Феҳристи мазкур дар сомонаи Марказ дар қолаби PDF низ ҷой дода мешавад, ки онро хоҳишмандон метавонанд боргирӣ ва чоп намоянд.

ТАВАҶҶУҲ! Қаблан дар сомонаи Марказ гунаи пешакии феҳристи комбинатсияҳои ихтисосҳо дар шакли ҷадвал ҷойгир карда шуда буд, ки бинобар зарурат дар он тағйиру иловаҳо ворид гардид. Аз ин лиҳоз, ба шахсони ихтисосҳоро бо истифода аз гунаи қаблии феҳрист интихобкарда тавсия медиҳем, ки бори дигар интихобҳояшонро бо маълумоти гунаи ниҳоии феҳристи комбинатсияҳои ихтисосҳои дар сомонаи Марказ ҷойдода ва ё барномаи “Интихоби ихтисос” муқоиса намоянд.