Душанбе, 15-уми майи соли 2023
Бо мақсади гузаронидани имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбии ҷумҳурӣ дар соли 2023 Маркази миллии тестии назди Президенти Ҷумҳурии Тоҷикистон семинарҳои омӯзиширо барои тренерон доир менамояд. Мақсади омода кардани тренерон аз он иборат аст, ки дар даври дуюм тренерони омодашуда кормандони муваққатии марказҳои имтиҳониро меомӯзонанд ва онҳоро барои қабулу гузаронидани имтиҳонҳо тайёр менамоянд.
Семинарҳои омӯзишӣ аз 15-ум то 16-уми майи соли 2023 дар шаҳри Душанбе дар муассисаи таълимии таҳсилоти миёнаи умумии № 100 барои намояндагони шаҳри Душанбе, шаҳру ноҳияҳои тобеи ҷумҳурӣ ва Вилояти Мухтори Кӯҳистони Бадахшон бо иштироки 15 нафар шунаванда оғоз шуд.
Аз 18-ум то 19-уми май дар бинои бахши минтақавии Марказ дар шаҳри Хуҷанд барои намояндагони шаҳру ноҳияҳои вилояти Суғд бо иштироки 19 нафар шунаванда, аз 18-ум то 19-уми май дар бахши минтақавии Марказ дар шаҳри Бохтар барои намояндагони шаҳру ноҳияҳои водии Вахши вилояти Хатлон бо иштироки 10 нафар шунаванда ва аз 18-ум то 19-уми май дар шаҳри Кӯлоб дар муассисаи таҳсилоти умумии № 51 барои намояндагони шаҳру ноҳияҳои минтақаи Кӯлоби вилояти Хатлон бо иштироки 13 нафар шунаванда баргузор мегардад. Дар баробари ин, аз ҷумлаи кормандони асосии Марказ 23 нафар ба семинарҳои омӯзишӣ ҷалб карда мешаванд ва ҳамроҳ бо тренерон дар давоми моҳи июни соли ҷорӣ дар 20 шаҳру ноҳияи ҷумҳурӣ семинарҳои омӯзишии кормандони муваққатии марказҳои имтиҳонӣ ташкил ва баргузор карда мешавад.
Ҳайати гурӯҳи корӣ барои ташкил ва баргузории семинари омӯзишии тренерон барнома, модули омӯзишӣ ва маводди иловагии ёрирасонро омода намуда, ба шунавандагон дар асоси дарси гузашта саволномаҳо пешниҳод мекунанд.
Тибқи эълони пешакӣ барои иштирок дар озмуни интихоби корманди муваққатӣ ба ҳайси тренер 60 нафар хоҳишманд ҳуҷҷат пешниҳод намуданд. Баъд аз омӯзиш ва таҳлилҳо ба 57 нафар хоҳишмандон иҷозат дода шуд, то ки дар семинарҳои омӯзишии мазкур иштирок намоянд. Аз байни онҳо 34 нафар ба ҳайси тренер интихоб ва ба кори муваққатӣ дар Марказ ҷалб карда мешаванд.
