Душанбе, 29-уми майи соли 2018

Дар доираи корҳои омодагӣ барои гузаронидани имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбии ҷумҳурӣ дар соли 2018 Маркази миллии тестии назди Президенти Ҷумҳурии Тоҷикистон семинарҳои омӯзиширо барои кормандони муваққатӣ: роҳбар ва ёвари роҳбари маркази имтиҳонӣ, маъмур ва маъмури калони имтиҳон, бақайдгирандаи маркази имтиҳонӣ оғоз кард.

Семинарҳои омӯзишӣ аз 29-уми май то 9-уми июни соли 2018 дар 18 шаҳру ноҳияи ҷумҳурӣ дар 26 нуқта гузаронида мешавад. Мувофиқи эълон дар марҳилаи 1-ум 3928 нафар хоҳишманд ҳуҷҷат супоридаанд. Дар марҳилаи 2-юм аз тарафи шуъбаи кадрҳо, коргузорӣ ва иттилоот ҳуҷҷатҳои пешниҳодшуда санҷида шуда, ҳуҷҷатҳои 2984 нафар хоҳишманд, ки ба талаботи дар эълон зикршуда мувофиқат карда буд, интихоб карда шуд. Дар марҳилаи 3-юм шуъбаи ташкил ва идораи имтиҳон ин ҳуҷҷатҳоро мавриди омӯзиш қарор дода, 2567 нафар довталаби барои кор ариза пешниҳодкардаро барои ширкат дар семинар-машварат иҷозат дод.

Шунавандагони семинар ба панҷ гурӯҳи зерини вазифаҳо тақсим карда шуданд, ки ба онҳо 31 нафар тренер ва 21 нафар корманди доимии Марказ дарс медиҳанд: 1) роҳбари маркази имтиҳонӣ, 2) ёвари роҳбари маркази имтиҳонӣ, 3) маъмури калони имтиҳон, 4) маъмури имтиҳон, 5) бақайдгирандаи маркази имтиҳонӣ.

Ҳайати гурӯҳи корӣ пас аз ду рӯзи дарсӣ ба шунавандагон дар асоси дарсҳои омӯхтаашон (бо такя ба барнома, модули омӯзишӣ ва маводи иловагии ёрирасон) саволномаҳо пешниҳод карда, донишу маҳорати шунавандагонро дар асоси талаботу принсипҳои муқарраршуда арзёбӣ карда, аз байни онҳо 2000 нафарро тибқи вазифаҳои номбурда интихоб ва ба кори муваққатӣ дар Марказ ҷалб мекунанд.

Тибқи фармоиши вазири маориф ва илми Ҷумҳурии Тоҷикистон дар 18 шаҳру ноҳияи ҷумҳурӣ 48 маркази имтиҳонӣ ташкил карда мешавад. Фаъолияти марказҳои имтиҳонӣ аз 1-уми июл оғоз мегардад ва кормандони интихобшуда дар ин марказҳо фаъолият хоҳанд кард.