Душанбе, 6-уми феврали соли 2024

6-уми феврали соли 2024 дар дафтари Маркази миллии тестии назди Президенти Ҷумҳурии Тоҷикистон (Марказ) бо иштироки роҳбарият ва мутахассисони Марказ, инчунин хабарнигорони ВАО нишасти матбуотии ин муассиса баргузор шуд.

Дар ин нишаст фаъолияти Марказ дар нимсолаи дуюми соли 2023 мавриди музокира қарор гирифт.

Ҷаъфарзода Сабзалӣ Файзалӣ, директори Марказ, баъди сухани ифтитоҳӣ вақти ҷудошударо ба ихтиёри рӯзноманигорон дод.  Ӯ, аз ҷумла гуфт, яке аз навгониҳои ИМД‑и соли 2023-юм ин буд, ки дар асоси “Тартиби гузаронидани имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбии Ҷумҳурии Тоҷикистон”, ки бо қарори Ҳукумати Ҷумҳурии Тоҷикистон аз 29-уми апрели соли 2023, № 188 дар таҳрири нав тасдиқ шуд, бақайдгирии довталабон барои иштирок дар имтиҳонҳои мазкур дар 4 давра роҳандозӣ гардид. Ин кор барои баланд бардоштани нишондиҳандаи иҷрои нақшаи қабули донишҷӯён ба донишгоҳу донишкадаҳои кишвар мусоидат кард  ва имсол низ баргузории чор давраи бақайдгирӣ ва имтиҳонот дар назар аст.

Баъди сухани муқаддимавии директори Марказ намояндагони ВАО-и кишвар ба пурсиш оғоз карданд  ва ба саволҳои худ аз ҷониби раёсат ва масъулони Марказ посух гирифтанд.