Душанбе, 3-юми марти соли 2023
3-юми марти соли 2023 дар Донишгоҳи аграрии Тоҷикистон ба номи Шириншоҳ Шоҳтемур марҳилаи якуми озмуни довталабон барои дарёфти Стипендияи байналмилалии Президенти Ҷумҳурии Тоҷикистон «Дурахшандагон» баргузор гардид. Дар маросими ифтитоҳи он муовини Сарвазири Ҷумҳурии Тоҷикистон Матлубахон Сатториён, сардори Раёсати маориф, фарҳанг ва иттилооти Дастгоҳи иҷроияи Президенти Ҷумҳурии Тоҷикистон Сафарзода Анвар, муовини вазири маориф ва илми Ҷумҳурии Тоҷикистон Абдулхолиқзода Лутфия ва директори Маркази миллии тестии назди Президенти Ҷумҳурии Тоҷикистон Ҷаьфарзода Сабзалӣ иштирок карданд.
Сараввал муовини Сарвазири Ҷумҳурии Тоҷикистон Матлубахон Сатториён дар ифтитоҳи озмун, аз ҷумла таъкид намуд, ки Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Ҳукумати Ҷумҳурии Тоҷикистон нисбат ба наврасону ҷавонон таваҷҷуҳи хос зоҳир карда, барои рушди неруи зеҳнии инсонӣ, тайёр намудани кадрҳои баландихтисос шароити мусоид фароҳам меоранд, ки таъсисёбии Стипендияи байналмилалии Президенти Ҷумҳурии Тоҷикистон «Дурахшандагон» мисоли он аст.
Лозим ба зикр аст, ки тибқи тартиби муқарраркардаи Ҳукумати Ҷумҳурии Тоҷикистон марҳилаи аввали озмунро ҷиҳати дарёфти Стипендияи мазкур барои дараҷаи бакалавр ва мутахассис Маркази миллии тестии назди Президенти Ҷумҳурии Тоҷикистон дар шакли тест баргузор мекунад. Тибқи маълумоти пешниҳодкардаи Муассисаи давлатии «Маркази барномаҳои байналмилалӣ» барои иштирок дар озмуни мазкур 152 нафар вобаста ба 5 гурӯҳи ихтисосҳо ҳуҷҷат супорида буданд. Аз ин шумора 140 нафарашон дар марҳилаи якуми озмун иштирок намуданд.
Марҳилаи дуюми озмунро аъзои Комиссияи ҷумҳуриявӣ оид ба интихоб ва тайёр намудани мутахассисон дар давлатҳои хориҷӣ баргузор менамояд. Ғолибони озмун аз рӯйи ихтисосҳои интихобкардаашон дар донишгоҳҳои кишварҳои мутараққии ҷаҳон таҳсил хоҳанд кард.
