Душанбе, 31-уми декабри соли 2024
31-уми декабри соли 2024 ба муносибати Иди Соли нави мелодӣ дар дафтари асосии Маркази миллии тестии назди Президенти Ҷумҳурии Тоҷикистон бо иштироки роҳбарият ва кормандони Марказ маҷлиси тантанавӣ баргузор гардид.
Директори Маркази миллии тестии назди Президенти Ҷумҳурии Тоҷикистон Ҷаъфарзода Сабзалӣ Файзалӣ оид ба дастовардҳои Марказ дар соли 2024 суханронӣ намуда, ҳамаи кормандонро бо фарорасии соли нав табрик гуфт.
Сипас сардори раёсати таҳияи маводди имтиҳон Азимов Ҷамшед ва муовини сардори раёсати банақшагирӣ, мониторинг, пажӯҳиш ва муносибатҳои байналмилалӣ Фазлиддинзода Абдулбосит дар робита ба соли наву таҷлили он ва дастоварду муваффақиятҳои Марказ дар соли сипаригардида андешаҳояшонро баён доштанд.
Таъкид гардид, ки таҷлили ҷашни Соли нав аз соли 1919 дар Иттиҳоди Ҷумҳуриҳои Шуравии Сосиалистӣ мувофиқи тақвими григорианӣ оғоз гардид. Дар Тоҷикистони соҳибистиқлол анъанаи ҷашнгирии Соли нави мелодӣ аз рӯйи тақвими григорианӣ давом дошта, тибқи Қонуни Ҷумҳурии Тоҷикистон “Дар бораи рӯзҳои ид” 1-уми январ ҳамасола дар қаламрави Ҷумҳурии Тоҷикистон рӯзи истироҳатӣ муқаррар карда шудааст.
Дар анҷоми маҷлис 1 нафар корманди Марказ бо нишони Аълочии маориф ва илми Ҷумҳурии Тоҷикистон ва 1 корманд бо сипосномаи Кумитаи иҷроияи Ҳизби Халқии Демократии Тоҷикистон дар ноҳияи Исмоили Сомонӣ қадр карда шуданд.
