Имрӯз, дар Маркази миллии тестии назди Президенти Ҷумҳурии Тоҷикистон бахшида ба рӯзи Парчами давлатии кишвар ҷамъомади идона доир шуд.
Дар чорабинӣ муовини якуми директори Маркази миллии тестӣ Ҷаъфарзода Сабзалӣ, раиси Иттифоқи журналистони Тоҷикистон Зинатулло Исмоилзода ва дигар кормандони Марказ ширкат намуданд.
Нахуст Ҷаъфарзода Сабзалӣ гирдомадагони маҳфилро ба Рӯзи Парчами миллӣ, ки аз соли 2009 инҷониб ҳамасола 24 ноябр дар сартосарӣ кишвар ҷашн гирифта мешавад, табрику муборакбод гуфта, иброз дошт, ки: “Парчами давлатӣ, ки яке аз рамзҳои давлати мустақилии тоҷикон мебошад. Он 24-уми ноябри соли 1992 дар Иҷлосияи 16-уми сарнавиштсози Шӯрои Олии кишвар қабулу расман тасдиқ карда шуд. Парчами кишвар мояи ифтихори миллӣ ва арзишмандтарин муқаддасот ба ҳисоб рафта, ҳамчун рамзи ҳастӣ ва пойдории давлат мебошад. Парафшон будани он аз давлати соҳибистиқлолу соҳибватанӣ башорат медиҳад. Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар паёми шодбошии худ таъкид намуданд, ки: “Мо вазифадорем, ки Парчами миллии худро ҳифз намоем, эҳтироми онро ҳамчун нишонаи давлатдории миллӣ, истиқлолу озодӣ ва арзиши бебаҳои миллӣ ба ҷо оварем”. Аз ин лиҳоз моро мебояд, ки ҳамеша баҳри парафшонии Парчами миллӣ саъю кӯшиш намоем”.
Сипас, Зинатулло Исмоилзода, раиси Иттифоқи журналистони Тоҷикистон суханронӣ намуда, тамоми кормандони Марказро бо ин иди бузург - Рӯзи Парчами давлатӣ муборакбод намуда, аз ҳамкории Марказ ба ВАО-и кишвар изҳори миннатдорӣ кард.
Дар охири маҳфил чанде аз кормандони Марказ бо мукофотҳои соҳавии Иттифоқи журналистони Тоҷикистон қадрдонӣ гардиданд.
