Душанбе, 8-уми сентябри соли 2023
8-уми сентябри соли 2023 дар дафтари Маркази миллии тестии назди Президенти Ҷумҳурии Тоҷикистон ҷаласаи идона баргузор шуд, ки ба Рӯзи истиқлоли давлатӣ бахшида шуда буд.
Нишасти идонаро директори Маркази миллии тестии назди Президенти Ҷумҳурии Тоҷикистон Ҷаъфарзода Сабзалӣ Файзалӣ кушода, ҳозиринро ба муносибати Рӯзи истиқлоли Ҷумҳурии Тоҷикистон табрик гуфт ва зимнан роҷеъ ба истиқлоли давлатӣ ва аҳаммияти бузург ва нақши он дар сарнавишти миллати тоҷик сухан кард.
Мазкур, аз ҷумла қайд кард, ки 32 сол боз мардуми шарифи Тоҷикистон, халқи барӯманди тоҷик аз анвори файзрези хуршеди истиқлол баҳра мебарад. 32 сол қабл – 9-уми сентябри соли 1991 санади барои миллату давлати тоҷикон сарнавиштсоз – Эъломияи истиқлолияти давлатии Ҷумҳурии Тоҷикистон пазируфта шуд ва ин рӯз дар таърихи Тоҷикистони навин бо ҳарфҳои заррин абадан сабт гардид. Тоҷикистони соҳибмухтору озод дар ин муддат худро на фақат ба ҷаҳониён муаррифӣ кард, балки дар дунёи мутамаддини имрӯза мақому манзалати баланд пайдо кард, Соҳибистиқлолии давлатӣ – ин неъмати гаронарзиш ба ҳамватанони мо на танҳо озодию худмухторӣ, инчунин пешрафту ободӣ, ҳамдилию ҳамзистӣ ва амну осоиштагиро эҳдо кард.
Дастоварди беқиёси давлату мамлакати мо, ки ба шарофати соҳибистиқлол шуданаш ба даст омад, ба номи Сарвари хирадойини он, Президенти Ҷумҳурии Тоҷикистон муҳтарам Эмомалӣ Раҳмон вобастагию иртиботи қавӣ дорад. Таҳти роҳнамоӣ ва бо талошҳои ин абармарди таърих кишвари мо пирӯзию дастовардҳои беназирро дар муддати на чандон тӯлонӣ доро гашт, – изҳор кард Ҷаъфарзода С. Ф.
Ҳар яки моро, чун шаҳрванди мамлакат, зарур аст, ки бо сипосгузорӣ аз ин неъмати бузург – соҳибистиқлолии давлатӣ – онро қадр ва ҳифз намоем ва барои саҳм гузоштан дар рушду тараққии кишвари маҳбубамон бештар азму талош созем, – таъкид кард директори Маркази миллии тестии назди Президенти Ҷумҳурии Тоҷикистон Ҷаъфарзода С. Ф.
Чанде аз кормандони Маркази миллии тестии назди Президенти Ҷумҳурии Тоҷикистон низ пиромуни Рӯзи истиқлолияти Ҷумҳурии Тоҷикистон изҳори ақида карданд, аз истиқлолу озодию ватандорию меҳандӯстӣ, аз неъмати амну офият, аз пешрафтҳои бесобиқаи кишвар... сухан гуфтанд ва ҳамагонро ба арҷгузорию ҳифзи дастовардҳои истиқлолияти давлатӣ, кору пайкори бештар баҳри рушду ободии ватан даъват карданд.
Дар ин ҷаласа ба муносибати ҷашн – Рӯзи истиқлоли давлатӣ чанде аз аъзои Ҳизби Халқии Демократии Тоҷикистон бо мукофотҳои ҳизбӣ қадр карда шуданд. Директори Маркази миллии тестии назди Президенти Ҷумҳурии Тоҷикистон Ҷаъфарзода Сабзалӣ Файзалӣ бо “Ифтихорнома” ва 4 нафар корманди Марказ, ҳамчун узви Ҳизб, бо “Сипоснома”-и Кумитаи иҷроияи Ҳизби Халқии Демократии Тоҷикистон дар ноҳияи Исмоили Сомонӣ сарфароз гардиданд.
Мукофотҳоро Гадоев Абдурасул, мудири шуъбаи таблиғот ва иттилооти Кумитаи иҷроияи Ҳизби Халқии Демократии Тоҷикистон дар ноҳияи мазкур, ки дар ҷаласа ҳузур дошт, ба аъзои Ҳизб – кормандони Марказ супорид.
