Душанбе, 19-уми ноябри соли 2024

Барои бо низоми имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбӣ (ИМД) шинос кардани синфҳои 11-уми муассисаҳои таълимии таҳсилоти миёнаи умумии ҷумҳурӣ Маркази миллии тестии назди Президенти Ҷумҳурии Тоҷикистон дар ҳамкорӣ бо Вазорати маориф ва илми Ҷумҳурии Тоҷикистон дар байни ин хатмкунандагон аз рӯйи низоми мазкур имтиҳонҳои озмоишӣ баргузор менамоянд.

Бояд тазаккур дод, ки дар мувофиқа бо раёсату шуъбаҳои маорифи шаҳру ноҳияҳои ҷумҳурӣ аз тарафи директорони муассисаҳои таълимӣ рӯйхати хатмкунандагон бо интихоби гурӯҳи ихтисосҳо (кластерҳо)-яшон, ки бо он дар имтиҳонҳои озмоишӣ иштирок хоҳанд кард, пешниҳод гардид.

Дар умум, аз 56 шаҳру ноҳияҳои ҷумҳурӣ рӯйхати 11058 нафар хатмкунандагон пешниҳод шуд. Дар асоси рӯйхатҳо ва гурӯҳи ихтисосҳои хатмкунандагон ҷудо ва таъйин кардани 1025 синфхонаи имтиҳонӣ дар назар дошта шудааст.

Имтиҳонҳои озмоишӣ дар давоми моҳҳои ноябр-декабри соли ҷорӣ аз тарафи кормандони Маркази миллии тестӣ дар ҳамкорӣ бо раёсату шуъбаҳои маорифи шаҳру ноҳияҳои ҷумҳурӣ дар 56 шаҳру ноҳияҳои ҷумҳурӣ гузаронида мешавад.

Бояд қайд намуд, ки дар имтиҳонҳои озмоишӣ аз 530 муассисаи таълимӣ хатмкунандагон ҷалб карда мешаванд. Баъд аз анҷоми имтиҳонҳои озмоишӣ аз тарафи кормандон ва мутахассисони Маркази миллии тестӣ варақаҳои ҷавобҳои хатмкунандагон санҷида шуда, натиҷаҳои имтиҳонҳои мазкур тавассути раёсату шуъбаҳои маорифи шаҳру ноҳияҳои ҷумҳурӣ ба муассисаҳои таълимӣ ирсол карда мешаванд.

 Хатмкунандагоне, ки бо сабабҳои гуногун дар имтиҳонҳои озмоишӣ иштирок намекунанд ё муассисаҳои таълимии онҳо ба имтиҳонҳои озмоишӣ ҷалб карда нашуданд, метавонанд аз сомонаи расмии Маркази миллии тестӣ (www.ntc.tj) истифода бурда, тавассути хизматрасонии “Худро бисанҷ” бо низоми ИМД шинос шаванд ва барои санҷидани худ аз он истифода баранд.

 Бояд хотиррасон кард, ки Маркази миллии тестӣ дар ҳамкорӣ бо Сарраёсати маорифи шаҳри Душанбе барои хатмкунандагони муассисаҳои таълимии таҳсилоти миёнаи умумии шаҳри Душанбе дар заминаи Маркази таҳлилӣ-иттилоотии назди Сарраёсат бо истифода аз барномаи хизматрасонии “Худро бисанҷ” имтиҳонҳои озмоиширо роҳандозӣ менамояд ва хатмкунандагон метавонанд аз тариқи компютер дониши худро санҷанд.

 Мақсад аз гузаронидани имтиҳонҳои озмоишӣ, пеш аз ҳама, шиносоии хатмкунандагон бо шинос шудан ба навъи саволу масъалаҳои тест вобаста ба фанҳои имтиҳонӣ, тарзу қоидаҳои имтиҳонсупорӣ ва пайдо намудани масъулият дар вақти супоридани имтиҳонҳои воқеӣ мебошад.

Раёсати ташкил ва идораи имтиҳони
Маркази миллии тестии назди Президенти Ҷумҳурии Тоҷикистон