Душанбе, 23-юми ноябри соли 2023
Маркази миллии тестии назди Президенти Ҷумҳурии Тоҷикистон дар ҳамкорӣ бо Вазорати маориф ва илми Ҷумҳурии Тоҷикистон имтиҳонҳои озмоиширо тибқи нақша баргузор карда истодааст.
Мақсад аз баргузории имтиҳонҳои мазкур муайян намудани сатҳи дониши хонандагони синфи 11-уми муассисаҳои таълимии таҳсилоти миёнаи умумӣ аз субтестҳо – фанҳои имтиҳонӣ, шиносонидани онҳо бо маҷмуи фанҳои имтиҳонӣ ва таркибу сохтори саволу масъалаҳои тест, баланд бардоштани масъулияти хатмкунандагон барои супоридани имтиҳонҳо аз рӯйи тарҳи ҷории маҷмуи фанҳои имтиҳонии низоми имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбии Ҷумҳурии Тоҷикистон (ИМД) аст. Имтиҳонҳои озмоишӣ, ки аз 14-уми ноябри соли 2023 оғоз гардид, тибқи нақша, вобаста ба шаҳру ноҳияҳо ва муассисаҳои таълимии интихобгардида то 15-уми декабри соли 2023 идома меёбанд.
Лозим ба зикр аст, ки тибқи Тартиби гузаронидани имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбии Ҷумҳурии Тоҷикистон, ки бо қарори Ҳукумати Ҷумҳурии Тоҷикистон аз 29‑уми апрели соли 2023, №188 тасдиқ шудааст, гузаронидани имтиҳонҳои озмоишӣ интихобан дар муассисаҳои таълимии таҳсилоти умумии асосӣ ва миёнаи умумӣ дар шакли тест яке аз вазифаҳои Марказ бо мақсади омода намудани хатмкунандагон ба имтиҳонҳои воқеӣ аст.
Вобаста ба ин, Марказ дар асоси натиҷаҳои ИМД-2023 беш аз 300 муассисаи таълимиро аз 53 шаҳру ноҳияи ҷумҳурӣ интихоб кардааст, ки тибқи пешниҳоди ин муассисаҳо беш аз 6 000 хонандаи синфи 11-ум барои иштирок дар ин имтиҳонҳо аз рӯйи гурӯҳҳои ихтисосҳои интихобкардаашон номнавис шудаанд. Имтиҳонҳо бо истифода аз китобчаҳои тести ИМД‑2023 тибқи забони имтиҳонсупории интихобкардаи хонандагон ба забони тоҷикӣ ва русӣ баргузор карда мешаванд.
Хотиррасон мекунем, ки дар сомонаи Марказ (https://ntc.tj/tj/ba-dovtalab/namunai-savolu-mas-ala-oi-olimpiada-oi-fann.html) гунаи электронии китобчаҳои тест ва варақаҳои ҷавоб ҷойгир карда шудааст. Муассисаҳои таълимие, ки аз ҷониби Марказ барои баргузории имтиҳонҳои озмоишӣ интихоб нагардидаанд, метавонанд бо истифода аз китобчаҳои тести дар сомонаи Марказ ҷойгиршуда барои хонандагон имтиҳонҳои озмоишӣ баргузор кунанд.
