Душанбе, 29-уми марти соли 2021
Тибқи фармоиши вазири маориф ва илми Ҷумҳурии Тоҷикистон аз 16‑уми марти соли 2021, № 366 Маркази миллии тестии назди Президенти Ҷумҳурии Тоҷикистон рӯзҳои 27-28-уми марти соли 2021 даври ҷумҳуриявии олимпиадаҳои фанниро барои хонандагони синфи 11-и муассисаҳои таҳсилоти умумӣ аз фанҳои табиӣ-риёзӣ баргузор кард. Олимпиадаҳои мазкур дар муассисаи давлатии таълимии «Мактаби президентӣ барои хонандагони болаёқат» дар шаҳри Ҳисор баргузор гардид. Дар он 414 нафар хонанда аз 247 муассисаи таълимии 59 шаҳру ноҳияи ҷумҳурӣ иштирок доштанд.
Рӯзи аввал (27‑уми март) олимпиадаҳо баргузор гардида, рӯзи дуюм (28-уми март) натиҷаҳои он эълон карда шуд.
Бо мақсади таъмини ҳуқуқи иштирокдорон ба арзёбии одилона дар рӯзи дуюм ба ҳар як иштирокдори олимпиадаҳо имкон дода шуд, ки дар сурати норозӣ буданаш аз холҳои ба ӯ гузоштаи Марказ аризаи апеллятсионӣ пешниҳод намояд. Гурӯҳҳои кории комиссияи апеллятсионӣ аризаҳои пешниҳодкардаи иштирокдорони олимпиадаҳоро дар ҳузури онҳо воқеъбинона баррасӣ карданд.
