Душанбе, 18-уми марти соли 2023

18-уми марти соли 2023 дар Маркази миллии тестии назди Президенти Ҷумҳурии Тоҷикистон ба муносибати иди Наврӯзи байналмилалӣ ҷаласаи тантанавӣ баргузор гардид.

 Ҷаласаро директори Марказ Ҷаъфарзода Сабзалӣ Файзалӣ оғоз карда, кормандони Марказро бо Наврӯзи байналмилалӣ табрик гуфт. Дар суханронии директори Марказ аз ҷумла қайд шуд, барои мо, тоҷикон, боиси ифтихор ва сарфарозист, ки иди Наврӯз – ин ҷашни куҳану бостонӣ ва ҷашни шукуфоии табиат бо кӯшишу эҳтимоми сарвари давлатамон, Пешвои миллат, Президенти мамлакат, Ҷаноби Олӣ, муҳтарам Эмомалӣ Раҳмон ҳамчун ҷашни байналмилалӣ эълон гардид. Наврӯз яке аз маҳбубтарин ҷашнҳои таърихӣ ва фарҳангии миллати тоҷик буда, ҳамчун рамзи офариниши ҳаёт, оғози тозаи зиндагӣ аз давраҳои дур то ба имрӯз расидааст.

Наврӯз эҷоди табиату тафаккури халқ ва миллатҳоест, ки дар тӯли ҳазорон сол ба тоҷикию форсӣ ҳарф мезананд. Наврӯз моли тоҷик, фарҳанги тоҷик, ҷашни тоҷик аст, зеро он исми тоҷикона дорад ва ин рӯзу ин идро дар тамоми кураи Замин бо лафзи шевои тоҷикӣ ном мебаранд. Ин мояи ифтихор аст барои ҳар фарди худогоҳу хештаншиноси тоҷик. Қайд кардан ҷоиз аст, ки Наврӯз хусусияти ба ҳам овардани мардум, устувор гардонидани пояи ваҳдату ҳамдилии халқҳоро низ дорост, – қайд кард Ҷаъфарзода С.Ф.

Сипас як қатор кормандон низ дар боби ҷашни Наврӯз табрикот ва ибрози андеша карданд.

Ба муносибати Наврӯз – иди бузурги миллӣ чанде аз кормандон барои фаъолияти пурсамарашон бо сипосномаҳои Марказ арҷгузорӣ карда шуданд.