Душанбе, 7-уми марти соли 2023

7-уми марти соли 2023 дар маҷлисгоҳи дафтари асосии Маркази миллии тестии назди Президенти Ҷумҳурии Тоҷикистон ба муносибати Рӯзи Модар ҷаласаи тантанавӣ баргузор гардид.

Ҷаласаро муовини якуми директори Марказ Шодиниё А.Ш. кушода, бо табрики бонувони Марказ ба муносибати идашон, дар боби бузургдошти зан – модар, мақоми ӯ дар ҷомеа ибрози назар кард. Ӯ, аз ҷумла қайд намуд, ки бонувони тоҷик аз даврони бостон бо ақлу заковати олӣ, ҷасорату диловарӣ, наҷобату фидокорӣ дар баробари мардон шуҳратёр гардидаанд ва имрӯз низ бо ин хислатҳои ҳамидаашон дар ободию созандагии кишвари маҳбубамон саҳми зиёд доранд.

Дар ҷомеаи мо таҳти сарварии хирадмандонаи Президенти Ҷумҳурии Тоҷикистон муҳтарам Эмомалӣ Раҳмон ба зан – модар мақому нуфузи баланд дода шудааст, зеро, тавре ки Сарвари давлат фармудаанд: «Ҷомеае, ки ба зан – модар ғамхорӣ менамояд, ба ояндаи худаш ғамхорӣ мекунад. Давлате, ки нисбат ба зан – модар – сарчашмаи ҳаёт ва бақои насли инсонӣ бепарво бошад, ояндаи худро аз даст медиҳад», – таъкид кард Шодиниё А. Ш.

Сипас як қатор кормандон низ бонувонро ба муносибати ҷашнашон табрик гуфта, дар боби бузургии зан – модар баёни андеша карданд.

Дар хотимаи ҷаласа бонувони Марказ ба муносибати Рӯзи Модар бо туҳфаҳои идона қадрдонӣ карда шуданд.