Душанбе, 23-юми феврали соли 2023
23-юми феврали соли 2023 дар маҷлисгоҳи дафтари асосии Маркази миллии тестии назди Президенти Ҷумҳурии Тоҷикистон бо иштироки директори Марказ Ҷаъфарзода Сабзалӣ Файзалӣ ва кормандони он ба муносибати 30-солагии таъсисёбии Қувваҳои Мусаллаҳи Ҷумҳурии Тоҷикистон ҷаласаи тантанавӣ баргузор гардид.
Ҷаласаро директори Марказ Ҷаъфарзода Сабзалӣ Файзалӣ кушода, кормандони Марказро ба муносибати 30-солагии таъсисёбии Қувваҳои Мусаллаҳи Ҷумҳурии Тоҷикистон табрик кард. Ӯ, аз ҷумла қайд кард, ки Артиши миллӣ аз ҷумлаи аркони давлатдорӣ ба ҳисоб меравад, зеро ҳеҷ як мамлакате бе артиш, бе қувваҳои мусаллаҳ наметавонад, ки ҳифзи истиқлоли давлатию мулкиашро таъмин намояд. Яъне, дар таъмини амнияту субот ва бақои давлат артиш нақши бисёр муҳимро дорад ва дар тамоми давру замон Қувваҳои Мусаллаҳи ҳар як давлату мамлакат омили асосии оромию осоиштагии мардум аст.
Артиши миллии Тоҷикистон дар ҷои холӣ, дар шароити набудани пойгоҳи моддиву техникии зарурӣ ва нарасидани кадрҳои баландихтисоси фармондеҳӣ шакл гирифтааст, яъне бунёдаш аз сифр оғоз ёфтааст. Зеро кишварҳои навтаъсиси пасошӯравӣ баъд аз барҳам хӯрдани Иттиҳоди Шӯравӣ қувваҳои мусаллаҳашонро асосан дар заминаи биною иншооти дорои аҳаммияти ҳарбии меросгирифта аз он бунёд карданд. Аммо Тоҷикистон пас аз барҳам хӯрдани Иттиҳоди Шӯравӣ ягон техникаву таҷҳизоти ҷангӣ ва аслиҳае, умуман, меросе дар соҳаи ҳарбӣ гирифта натавонист. Бояд таъкид кард, ки аз байни понздаҳ ҷумҳурии собиқи Иттиҳоди Шӯравӣ пас аз пошхӯрии он Тоҷикистон ягона давлате буд, ки аз артиши шӯравӣ чизе мерос нагирифта буд. Ҳол он, ки ҷумҳуриҳои дигар қисмҳои ҳарбии дар қаламравашон ҷойгирбударо бо тамоми техникаи ҳарбӣ ва муҳиммоту лавозимоти ҷангӣ соҳиб шуда, онро миллӣ гардониданд ва ба ҳамин васила артишу сохторҳои дигари низомиашонро таъсис доданд. Бунёду таъсиси Артиши миллӣ ва Қувваҳои Мусаллаҳи мамлакат ҳамагӣ баъди якуним соли ба даст овардани истиқлоли давлатӣ – дар марҳалаи хеле муташанниҷу ҳассоси таърихӣ сурат гирифт. Ин замоне буд, ки бақои давлати мустақили тоҷикон таҳти хатари ҷиддӣ қарор дошт. Бинобар ин, мамлакати моро зарур буд, ки бо ҳар роҳе воситае, ки бошад, Артиши миллиашро таъсис диҳад.
Моҳи феврали соли 1992 аз тарафи Раиси Шӯрои Олии Ҷумҳурии Тоҷикистон муҳтарам Эмомалӣ Раҳмон Қарор «Дар бораи таъсиси Қувваҳои Мусаллаҳи Ҷумҳурии Тоҷикистон» ба тасвиб расид ва дар заминаи Фронти халқӣ ва гурӯҳҳои мусаллаҳе, ки Ҳукумати конститутсиониро тарафдорӣ мекарданд, Артиши миллӣ бунёд шуд. Ҳамин тавр, 23-юми феврали соли 1993 нахустин паради ҳарбии ҷузъу томҳои Артиши миллӣ баргузор гардид ва ин рӯз расман санаи таъсисёбии Қувваҳои Мусаллаҳи Ҷумҳурии Тоҷикистон эълон карда шуд, гуфт директори Марказ.
Баъдан аз ҷониби як қатор кормандон низ суханҳои табрикотӣ ба муносибати 30-юмин солгарди таъсисёбии Қувваҳои Мусаллаҳи Ҷумҳурии Тоҷикистон шунида шуд.
Дар фарҷом директори Марказ Ҷаъфарзода Сабзалӣ Файзалӣ ҳозиринро ба муносибати 30-юмин солгарди таъсисёбии Кувваҳои Мусаллаҳи Ҷумҳурии Тоҷикистон муборакбод гуфта, барояшон саломатӣ, рӯзгори босаодат, осмони соф, хушбахтии оилавӣ ва барору комёбиҳоро таманно кард.
