Душанбе, 8-уми январи соли 2024
Рӯзи 8-уми январи соли 2024 дар дафтари асосии Маркази миллии тестии назди Президенти Ҷумҳурии Тоҷикистон (минбаъд: Марказ) ҷаласаи ҷамъбастӣ-ҳисоботӣ дар соли ҷорӣ баргузор шуд. Дар ҷаласа ҳамаи кормандони дастгоҳи асосӣ ва сардорони бахшҳои Марказ дар шаҳру ноҳияҳои ҷумҳурӣ, инчунин мушовири бахши ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа Масрур Абдуллозода ширкат карданд.
Ҷаъфарзода Сабзалӣ Файзалӣ, директори Марказ, роҷеъ ба фаъолияти муассиса дар соли сипаришаванда, бахусус оид ба корҳои анҷомдода марбут ба имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбии Ҷумҳурии Тоҷикистон (ИМД), тағйироту навгониҳои рухдода вобаста ба низоми имтиҳонҳои мазкур дар соли 2023, комёбиву дастовардҳои Марказ дар низоми ИМД ва умуман, ҳамаи самту ҷанбаҳои фаъолияти он ба таври муфассал маъруза кард. Дар суханронии мазкур, аз ҷумла, тазаккур дода шуд, ки соли сипаришаванда “Тартиби гузаронидани имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии Ҷумҳурии Тоҷикистон” бо қарори Ҳукумати Ҷумҳурии Тоҷикистон аз 29‑уми апрели соли 2023, № 188 тасдиқ шуд ва Марказ фаъолияташро аз рӯйи он ба роҳ монда, ИМД-ро дар ин замина мутобиқан роҳандозӣ кард. Навгонию тағйироти ба тартиб воридшуда дар низоми ИМД татбиқу амалӣ гардид, ки ин барои таъмини комилу ҳамаҷонибаи усулҳои муқарраркардаи Марказ дар фаъолияташ шароити мувофиқтару бештарро фароҳам меорад.
Директори Марказ, дар баробари ин, камбуду мушкилоти кори Марказ дар соли 2023 ва зарурати рафъи онҳо, вазифаю ҳадафҳоро барои соли оянда дар ҳисоботаш қайд кард.
Мушовири бахши ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа Масрур Абдуллозода аз ҳисоботи муфассалу фарогири директори Марказ изҳори қаноатмандӣ карда, зимнан қайд намуд, ки фаъолияти кормандони Маркази миллии тестӣ дар соли 2023 хеле самарабахш ва аз он ҷиҳат нисбатан фарқкунандаю пурмаҳсул буд, ки Марказ аз рӯйи тартиби нави тасдиқкардаи Ҳукумати Ҷумҳурӣ имтиҳонҳои марказонидаи дохилшавиро ба муассисаҳои таълимии таҳсилоти миёна ва олии касбии Ҷумҳурии Тоҷикистон мутобиқан ба роҳ монд ва дар ин замина ИМД дар чор давра гузаронида шуд. Чунин тартиби баргузории имтиҳонҳо барои таъмини як принсипи муҳимми кори Марказ – усули дастрасии баробари довталабон ба таҳсил бештар мусоидат мекунад. Ҳамчунин, дар ин маврид хоҳишмандоне, ки дар марҳалаҳои аввали имтиҳонҳо иштирок карда наметавонанд, дар давраҳои баъдии имтиҳонҳо ширкат менамоянд, яъне ин тартиби кор барои фарогирии ҳарчи бештари талабгорони таҳсил мусоидат менамояд.
Абдуллозода М. таъкид кард, ки Марказ ба дастоварду комёбиҳои ҳамасолааш қонеъ нашуда, бояд барои рафъи камбуду мушкилоти ҷойдошта ва беҳбуди фаъолияташ дар солҳои минбаъда бештар бикӯшад.
Дар охир зумрае аз ҳозирин – кормандони Марказ пиромуни гузориши ироакардаи директори Марказ фикру андеша ва пешниҳодҳошонро иброз доштанд.
